Vawiin khan I&PR Conference Hall, Mamit-ah  SSA Mission, Mamit bultumin, Mamit District SSA Mission  hnuaia Block Resource Centre Coordinator, BRC office a thawkte leh Cluster Resource Centre Coordinator te tan ni  2 awh Workshop on Transformation of Aspirational District neih a ni a, Pu K. Laldingliana, Addl Secretary,  Mizoram Education Department,   chuan khuallian niin a hmanpui. 

Khuallian  K Laldingliana chuan District hnufual chawikan ngai (Aspirational District) te chawikan dan tura Sorkar duhdan leh beiseina te sawiin, zirna chungchanga hmalakna tur hrang hrang te a sawifiah a,  zirna lama Mamit District dinhmun tarlangin, Aspirational District kan nihna atanga khaichhuah kan nih theihna turin Education Department chuan mawhphurhna sangtak kan neih avangin, Workshop-a telte chu uluk taka training nei tur leh an hnathawhna kawngah theihtawp chhuah turin a sawm bawk a ni. 

Vawiin Workshop hawnna hi Pi R. Lalnunthari, District Education Officer chuan a kaihruaia, Pu Lalsailova, District Project Co-ordinator chuan Mamit District zirna kawnga rangtak leh awmze neia  chawikan anih theihna tura point   chhawpchhuah hrang hrangte alem nen entirna a nei a, heng bakah hian mithiamte'n  chawikan kan ngaihna tur leh hmalak dan turah zirtirna an pe bawk a ni.  District chhunga BRCC leh CRCC  te hnen atangin an hnathawhna chanchin,  harsatna an neih te leh an bial chhung dinhmun report te ngaihthlak a ni bawk.

Mamit District-ah hian Block Resource Centre (BRC) 4 leh Cluster Resource Centre (CRC) 17 a awm a ni.Training hian naktuk thleng a awh ang.