803/2025-2026

Champhai, dated 10th June 2025: Vawiin khan DC Conference hall, Keifangtlangah District Level Steering Committee on Stop Diarrhoea Campaign chu Addl. DC Pu K. Zorammuana hovin an thukhawm, Champhai District chhunga hmalak dan tur hrang hrang te sawiho a ni.

Chairman Pu K. Zorammuana chuan inven theih leh enkawl dam theih natna avanga nunna chan an awm loh na tura tan lak pawimawhzia sawiin kawthalo laka naupang an him theihna tura hmalakna te puanzar tam a tul thu a sawi a, a inenkawl dan leh inven dan inzirtir tam a tulzia a sawi. Kalkhawmte chu an tihtur tha taka hlenchhuaka an hmalakna tur felfai tak siam turin a chah a ni.

Member Secretary leh CMO, Champhai District ni bawk Dr R. Lalnienga chuan Stop Diarrhoea Campaign-in a tum ber chu India ram pumah naupang kum 5 hnuailam kawthalo vanga thi an awm tawh lohna tura beihpui thlak a nih thu a sawi a, Health Department chauhin a hmalak sen a nih loh avangin line department te pawhin kawthalo natna umbo a nih theihna turin an chanvo te tha taka hlen chhuaka thawpuiah sawm a ni.

STOP Diarrhoea Campaign hi Sawrkar Laipui ruahmanna niin thla hnih chhung – June leh July, 2025 chhunga neih tur a ni a. Champhai District ah pawh a hawnna programme hi June ni 16, 2025 chawhnu dar 12 ah Venglai Comprehensive Middle School-ah neih tur a ni a, District Bawrhsap chu Khuallian niin Line department te atangin khawthalo dona tur a chetlak dan tur inzirtirna neih a ni dawn bawk a ni. He campaign hun chhung hian naupang kum 5 hnuai lam te chu ORS leh Zinc pek vek an ni dawn a ni.

Vawiin meeting-ah hian Pi C. Lalramengi District Programme Manager, CMO Office hnen atangin Power Point Presentation hmangin Champhai District in hma a lak tawh dan leh hmachhawp a neih hrang hrangte leh line department tin ten an hmalakna tur tarlangin, ASHA worker hnen atangin khawthalo dona tur atana mitin kan ti tur kut silfai dan an entir bawk a ni.