804/2025-2026

Lunglei, 2025 Nikir thla ni 10: Vawiin khan Lunglei District-a hma sawnna hna thawh hrang hrang huap zo, rualkhai leh awmze nei zawka kalpui a nih theih nana hma la tura din District Planning Committee (DPC) chu an Chairman, District Bawrhsap Pi Navneet Mann hovin Lunglei DC Conference Hall-ah an ṭhu khawm.

He ṭhut khawmah hian line department hrang hrang aṭanga Article 275(1) hnuai leh PM-DAJGUA (Aaba Janjatiya Gram Utkarsh Abhiyan) hnuaia hma sawnna hna thawh tur ruahmanna leh rawtna lutte thlir ho niin, state sawrkara theh luh tur chin thlit fim a, pawm a ni a. Bawrhsap Pi Navneet Mann chuan Article 275(1) leh DAJGUA te chu tlang mi (tribal)-te tihhma sawnna atana sawrkar laipui ruahmanna a nih angin a scheme-in a ngaih pawimawhte tinzawn chunga rawtna leh ruahmanna siam a ṭul thu a sawi a. Department hrang hrangte'n rawtna an theh luhah scheme dang nena hma lakna inthuah a awm loh nan fimkhur a ṭul thu leh hma lakna tur atan ram a awm ngei em tih chian a, ruahmanna felfai tak neih lawk a ṭul thu sawiin, ngaih pawimawh tur tam tak zingah mipuite khawsak chawi kanna tur lam hawi chu dah pawimawh hmasak ṭha a tih thu a sawi a ni.

He hunah hian Member Secretary, Planning & Programme Implementation Department-a Deputy Adviser-cum-Deputy Secretary Pu Isak Lalmuanpuia Chuaungo chuan District Planning Committee chungchang leh mawhphurhna te, hmasawnna tluantling leh tlo nei tura Lunglei District thlen chin leh hmabak hrang hrang awmte a lem nen entirin a sawi fiah a. Line department hrang hrang aṭangin an rawtnate a mal te tea ngaihthlak niin, sawi ho zui a ni.

Vawiina Lunglei District Planning Committee ṭhu khawm chuan Article 275(1) hnuaiah cheng nuai 480.054 hu project 7 leh DAJGUA hnuaiah cheng nuai 1,842.91 hu project 11 chu state sawrkara rawtna theh luh atan a pawm a. Project neitu line department hrang hrangte'n lehkha pawimawh leh ruahmanna kimchang chu DC office-ah theh lutin, DC office aṭangin state lamah theh luh nghal a ni ang.