No.371/2021-2022

Dated Champhai, the 3th May, 2021: Vawiin chawhma khan Champhai District Level Task Force on Covid-19 chu Chairman Pi Maria C.T Zuali hovin DC Conference Hall-ah an thukhawm a, Covid-19 hrileng do kawnga Damdawiiin lam inpuahchahnate, Covid-19 avanga thite buaipui dan tur leh tul dangte ngaihtuahho a ni.

Pi Maria C.T Zuali chuan Covid-19 hrileng laka him tlanna kawnga tanrualna leh thawhhona tha tak awm thin chu lawmawm a tih thu sawiin, ramri depa awm Champhai District-ah inthlahdah a thiang lova, hrilengin zual lam a pan zel vang leh Covid Strain tharte a awm tak zel avangin kan zavaia him tlanna atan sawrkarin inkaihhruaina a siamte thuawih taka kan zawm hram hram a ngai a ni, a ti a. Hrilengin nghawng nasa zawk leh harsatnate a thlen theih avangin hriselna kawnga inenkawlna hmunhmate leh hmanraw neih dante hrechianga, inpuahchahna turte thlirho chung zela hmalak dan turte ngaihtuahhoa meeting neih a nih thu a sawi a. Bawrhsap chuan sawrkar dan siamte chuan nunphung tikhaihlak deuhin lang mahse, kan zavai tana him tlanna tura duan a ni tih hriaa, thuawih taka zawm theuh turin District mipuite a chah a ni.

District Hospital Champhai dinhmun leh inpuahchahnate Dr. Zatluanga, DMS Champhai hnen atangin ngaihthlak a ni a. Tun dinhmunah District Hospital Champhaiah B-Type Oxygen Cylinder 64, D-Type Oxygen Cylinder 20 leh Oxygen Concentrator 6 a awm mek thu sawiin, ICU khum 5 awmnaah Ventillator 5 leh Oxygen line 2 a awm mek thu a tarlang bawk. CMO Champhai Dr. R.Lianmawia chuan tun dinhmunah Nursing School Building-ah khum 64 awmna Covid Care Centre (CCC) leh khum 20 awmna Dedicated Covid Health Centre (DCHC) din a nih thu a sawi a. CMO Champhai huamhhung Damdawiin hrang hrangah B-Type Oxygen Cylinder 108 a awm mek thu leh bur ruakte a lokir hnuah thunkhah leh tura thawn thin a nih thu a sawi bawk.

He hunah engtiang chiahin nge Covid-19 hrileng a darh tih hriatna tura sawrkarin Random Testing ti tura order a siam chungchangte pawh sawiho niin, dinhmun hriat chian nan District Disaster Management Authority (DDMA) kaltlangin Thawhlehni, May Ni 4, 2021 hian Dawrkai, mutia, mipui phur lirthei khalhtute leh Filling Station thawktute chu Govt. Primary School-II, Vengthlangah a tahtawla test neih sak nise tih a ni a. Meeting chuan Covid-19 avanga vanduaithlak taka boral an awm thulha hmalak dan turte ngun taka ngaihtuahin Covid-19 vanga thi an awm chuan a rang thei ang bera invui nghal zel ni se, thlanmuala inphum nghal emaw, Community Hall/Kohhran Hall-a vuina tawi neih hnuah a rang thei ang bera inphum nghal zel ni se tiin a rel a. Heng bakah Qurantine ngai, mahni in lama inkhung hranna mumal neilote tan sawrkar ruat Polytechnic Building Tlangsam bakah veng tin VLTF-te, an hmunhma neih angte ngaihven tura tih chungchangte pawh sawiho niin, hmunhma ruatte a kimchanga thehluh a nih hnuah Qurantine Facilities list kimchang tarlana, mumal taka kalpui thei tura hmalak nise tih a ni bawk.

Tun dinhmunah Covid Care Centre, Nursing School Building Champhaiah Covid-19 vei mi 5, Mipa 3 leh Hmeichhia 2 te enkawl mek niin, heng bakah hian ZMC a refer Mipa 1 a awm mek bawk. Champhai District-a Covid-19 vei hmuhchhuah tawh zat chu vawiin thlengin mi 122 an ni tawh a, heng zinga 116 te chu enkawl dam an ni. October ni 26, 2020 atanga Covid-19 No Tolerance kalpui atanga nimin thlenga Champhai khawpui chhunga Covd-19 dan bawhchhia man tawh zat chu mi 1,754 niin, pawisa chawi tlingkhawm zat chu Rs 2,29,800/- a tling tawh a ni.