No.370/2021-2022

Kolasib dated 3rd May, 2021: Vawiin chawhma khan Pu K.Lalrinliana, Minister of State, Food, Civil Supplies & Consumer Affairs Department chuan Bairabia Oil Depot bunna tur hmunhma tihfel tur a hmalaknate enin Dr.H.Lalthlangliana, Deputy Commissioner, Kolasib chu a pisaah a kawm a, Kolasiba inkhuahkhirna kalpui chhunzawm dan turte an sawiho bawk a ni.

Bairabia Oil Depot bunna tur a ram mamawh zawng zawngte chu DC Office, Kolasib hmalaknaa endik vek tawh a nih thu leh a tul anga bawhzui a nih theih nan March 2021 khan Departmental Land Selection and Purchased Board hnenah thawn a nih thu tarlan a ni a. Hemi atan hian ram 46.70 acre a zau, mi 26 te hming a awm chu endik tawh a ni.

Minister Pu K.Lalrinliana chuan Bairabi Screening Point-a Covid-19 Positive hmuchhuahte Covid Care Centre panpui an nih hma a an lo awm hran lailawkna tur hmun changtlung zawk ruahman dan tur Kolasib DC chu sawipuiin, Covid-19 positive-te phurhna atan a hman tur hian MLA Fund hmangin Ambulance buatsaih mek a nih thu a sawi.

Kolasib chu State thenawmte nen a ramri intawm a nih angin ram pawn atanga lo lutte uluk tak a endik thin an ni a. Mizoram mi leh sa, ram pawn atanga lo lut, Screening point-ah Covid-19 positive an ni tih hmuhchuahte khung hran leh enkawlna atan Jordan Home, Sethawn chu tangkai zawk a hman a nih theih dan turte sawi a ni bawk.

Pu K.Lalrinliana chuan natna hrang hrang avanga Dialysis tih ngai mi thahnem takin sum tam tak sengin Aizawl an pan thin thu a sawi a, hemi avangin hian District hospital-ah Dialysis tihna khawl 3 dahna turin ruahmanna a siam thu a sawi a, kum 45 hnuai lam ten Covid-19 vaccine an lak theihna turin Mizoram sawrkar a inbuatsaih mek thu a sawi bawk a ni.

Attachment

  • Loading attachment...