1601/2025-2026

Champhai, dated 25th September, 2025: Vawiin chawhnu dar 2 khan CHANEM tual zawlah Faina Beihpui SWACHHATA HI SEVA 2025 ‘Ek Din, Ek Ghanta, Ek Saath’ ‘ Ni Khat, Darkar Khat, A huhoin’ Sorkar hnathawkte Fai hnatlang pui hawnna inkhawm tawi neih a ni.

He hunah hian Champhai Bawrhsap Pu Mohammad Aaquib chuan thu sawiin Faina hnatlang a tel tura thawk chhuak zawng zawng hnenah lawmthu a sawi a, Champhai District a lo fai a, a lo thianghlim theihna turin faina kan nitin nuna beh tira a, faina pawimawhzia kan sawi fo thin chu a taka thawhchhuahpui turin a sawm a, Champhai leh India pumpui a lo fai theih nan kan chetziaa midangte zirtirtu nih tum turin kal khawmte a chah a, hnatlanga feh chhuak turte'n bawlhhlawh dahna tur (Garbage Bag), kutkawr (Gloves) leh hmunphiah an lak hnuah a vai liam a ni.

Inkhawm hi DUDO Pu Ngulzathuama'n hun a kaihruai a, Champhai Officers Club aiawhin Dr. Zatluanga, DMS in thu a sawi bawk a ni.

Sorkar hnathawkte Fai hnatlang pui hi Champhai Officers Club ruahmanna anga kalpui a ni a, CHANEM atanga Bethel kawn inkarah hmun kua (9) a inthenin Faina Hnatlang hi a neih a ni a, Sorkar hnathawk thahnem tak an thawk chhuak a ni.

Vawiin vek hian Champhai khaw chhung hmun hrang hrangah VC te kaihhruainain veng chhung thian faia runthlak neih a ni bawk.

Faina Beihpui Swachhata Hi Seva Campaign, 2025 hi kum tin neih thin a ni a. Kumin hian kum dang zawng aia uar zawka mipui a tam thei ang ber tel theihna tura ruahhmanna siam a ni. He faina beihpui hian a tum ber chu kan ram, kan khua leh vengte a lo fai lehzual theih nan mipui hnena faina chungchang inzirtir te, faina kawnga a tam thei ang ber thawk chhuak tura hmalak te, hmun bal zual lai hman tlaka chhuah theih tura tihfai hnatlang neih bakah, faina nitin nunphunga bet tlat tura in zirtir leh Faina hnathawktute hlutzia zirtir a ni. Swachhata Hi Seva Campaign 2025 hi September ni 17 atanga October ni 2 thleng awh tur a ni a, hemi pual hian Department hrang hrang, VC, NGO ten Faina beihpui an thlak mek a, Faina hnathawktute a thlawna inentirna Health Department-in an nei dawn bawk a ni.