1600/2025-2026

Aizawl the 25th September 2025: Vawiin khan Chief Minister Pu Lalduhoma chuan CM Conference Hall-ah a department enkawl pahnih General Administration Department leh Law & Judicial hmalakna review meeting a neihpui a. Pu TBC Lalvenchhunga, Adviser to CM leh Pu Vanlaldina Fanai, Commissioner & Secretary to CM ten an tawiawm.

Chawhma lamah GAD hmalakna a enpui a. GAD hnuaiah hian Deputy Commissioner sawm leh pakhat, GAD (Main), GAD (Secretariat Administration Wing), GAD (Protocol & Hospitality), GAD (Aviation), Mizoram House pasarih, Mizoram Information Commission, State Election Commission, Sinlung Hills Council, Sialkal Range Development Council leh Chief Election Commission te an awm a. Heng GAD enkawl peng hrang hrangte hnathawh hi kimchang takin an sawi a ni.

GAD dinhmun leh hnathawh thenkhatte chu:

1. MINECO ram hi 6,42,676.04 Sqm a zau niin plot hi 90 a awm tawh a. Plot hi pek chhuah tur a awm tawh lova ngaih niin kumin July thla atang khan plot thar pek chhuah khapna siam a ni.

2. Ainawn vengah sorkar quarters building 47 a awm a, chhungkaw 184 luah theih a ni. A luahtu zinga chhungkaw 45 chauhvin dan anga sorkar allotment an nei. Kum 2023 -a Council of Minister-in quarters te hi thiah vek tur tia a lo rel tawh angin tuna luah mekte hi a Zone ang zelin an chhuah hun bituksak an ni. A chhuak hnuhnung ber turte chhuah hun chu January 2026 a ni. Quarters te hi a thar sak a ni ang.

3. District-a Independence Day/ Republic Day lawmna senso, district office hrang hrangin an thawhkhawm thin chu a tawp theih nan, sorkarin budget head siamin, pawisa dah ve tawh se tia rawt a ni.

4. District Administration (Deputy Commissioner) ramri mila department dangte bial enkawl herrem a tulzia tarlan a ni a. Zirchian ni se an ti.

5. Lengpui Airport Runway thuam that nan sorkarin tun hnaiah Rs. 86.8 crore a pe a. Hna a thawh theih veleh (working season) chak taka thawk turin mamawh lam khawm mek a ni. Airport ram hung na tur Rs. 162.06 lakh, Terminal-a Air Condition bunna tur Rs. 544.06 lakh leh Conveyor Belt pahnih bunna tur Rs. 375.84 lakh te pek tawh an ni.

6. Lengpui Airport an enkawl theih dan tur an rawtna AAI atanga nghah mek a ni.

7. Mizoram Helicopter Service mek atangin kum khatah Rs. 33 Cr. vel hmuh thin a ni. State sorkarin kum khatah Rs. 2.5 Cr. vel a seng ve thin.

8. RCS UDAN hnuaiah October thla atang hian Pawan Hans Helicopter a service belh leh dawn a, a service-na tur zingah Aizawl - Silchar leh Aizawl - Churachanpur pawh a tel.

9. Thenzawlah Rs. 12 Cr. sengin Heliport sak tum a ni a. Ministry of DoNER ah lehkha pawimawh thehluh vek tawh a ni.

10. Tunah hian GAD hian SASCI Fund hmangin project sawm leh pakhat an kalpui mek a. A langsarte chu Construction of Integrated Office at MINECO te, Construction of General Pool of Government Quarters at Lunglei, Lawngtlai, Siaha, Serchhip, Kawnpui & Bairabi, Construction of Circuit House at Siaha, Serchhip & Saitual te an ni.

11. GAD in leiba an ngah thin a, tun hnai kum hnih chhungin an leiba tam tham tak hi sorkarin a rulhsak deuh tak vek avangin lawmthu an sawi. GAD hnuaiah hian Officer hi 250 aia tam awmin thawktu hi 1000 chuang an awm.

GAD hi Service Review Committee hmalakna nei hmasa ber nia hriat an ni a. Sorkar hnathawktute zirchiang a, thawkzui zel tlak lo emaw thawkzui thei tawh lote chu Special Pension Scheme hmanga pension pek tur an ni. An hmunruak hnawhkhahna tur hi rang taka kalpui dan dap a tul thu tarlan a ni a, Single Window Clearance system hmanga heng mite pual bik recruitment hi kalpui a that rin a ni.

Chawhnu lamah Law & Judicial department hnathawh thlirhona neih leh a ni. An dinhmun leh hmalakna langsar zualte chu:

1. Law & Judicial Department hnuaiah hian Advocate General, Aizawl Bench, Advocate General Principal Bench, Govt. Advocate/Public Prosecutor Aizawl leh district hrang hrang, Registrar General of Marriages, Fast Track Special Court (CSS) leh Mizoram State Legal Services Authority te an awm. High Court leh District Courts te nodal department a ni bawk.

2. Department-hi Mizoram sorkar hnuaia department ten court case an neih zawng zawng endiktu a ni a. Tun dinhmunah Mizoram sorkar khinna Court case hi 4002 a awm mek a, heng bakah hian NGT Case a la awm bawk.

3. January 2024 atanga August 2025 inkarah - Parawise Comment Vet a neih tawh zat chu 566 a ni a, Legislation leh Cabinet Memo kaihhnawih a Vet tawh zat chu 386 a ni. Department hrang hranga legal advice a pek tawh hi 162 niin MoU/MoA a vet-sak tawh zat chu 173 a ni.

4. India ram criminal law tharin a phut angin Directorate of Public Prosecutors din tura hmalak mek a ni.

5. Mizoram pumah Registrar of Marriages 735 an awm mek.

6. Tun thla ni 19 khan Chief Minister hian Serchhip District Court-ah Additional District & Sessions Judge Circuit Court a hawng a. Hei hi Mizorama a hmasa ber a ni.

7. June 2024 khan a vawikhatna atan Central Administrative Tribunal Mizoramah an rawn thu.

Review meetinga an rel te hi minute siam zel a ni a. Review Meeting neih leh hunah hma an sawn dante thlirpui leh zel thin a ni ang.

GAD leh Law & Judicial thawktute hian, Chief Minister-in an hmalakna a enpui leh an duh leh mamawhte a hnena thlenna hun tha tak a buatsaihsak avangin lawmthu an sawi a. Kan hnathawh min hriatpui vang ringawt pawh hian kan phur a, kan hlim hle a ni, tiin Chief Minister chungah hian lawmthu an sawi.