1599/2025-2026

Dated Aizawl, the 25th September, 2025: Vawiin khan Art & Culture Department hnuaia Mizoram State Archives chuan ni khat awh Record Management Workshop a buatsaih a. Sawrkar department hrang hranga thawkte leh Mizoram Baptist Church aiawhte, an vaiin mi 41‐an chhim a ni.

He workshop‐ah hian Art & Culture Department Director Pi Carol VLMS Dawngkimi chu khuallian niin, a hnen atangin Mizoram State Archives‐a record vawnthat tam ber chu British‐in min awp hunlaia mi a nih thu leh UT leh State kan nih hnua record kan neih that loh tial tial thu ngaihthlak a ni a. Record leh file enkawl leh vawnhim chungchanga tan la sauh sauh tur leh Mizoram State Archives chhawr tangkai zel turin kalkhawmte a chah a ni.

He hun hi Pu F Lalthanmawia, Jt. Director, Art & Culture Department chuan a kaihruai a; Resource Person atan Pu K. Lalruala, Deputy Director (Rtd) Art & Culture Dept. leh Pu C Lalmuanpuia, Chemist II, Mizoram State Archives‐te rawih an ni a. Pu Paul Lalringzuala, Superintendent of Archives‐in report tawi pein, archive digitisation chak taka kalpui mek a nih thu leh record leh file an kawl mek atanga 80% chu digitise a nih tawh thu a sawi a ni.

Workshop chhimtute chu digitisation room, research & laboratory room leh repository room‐te fanpui an ni a. Resource Person‐te atangin The Mizoram Public Records Act 2011 leh Mizoram Public Records Rules 2014 an zir a. File, register, map, thlalak, audio file leh video file tha taka vawn that dan zirin, sawrkar department hrang hrangte’n Record Creating Agency leh record management tha tak an neih a pawimawhzia an ngaithla bawk a ni.