No.4223/2021-2022

Aizawl, the 10th March, 2022: Khawpuia cheng mahni puala chenna in neilote tana insak tanpuina Scheme, Pradhan Mantri Awas Yojana-Housing for All (PMAY-HFA Urban) kaltlanga hamthatna dawng tur thlangtu District Screening Committee on PMAY-Housing for All (Urban), Champhai District chu vawiin khan an Chairman Pu Henry C.Lalrawnkima, District Bawrhsap hovin DC Conference Hall-ah an thukhawm.

Pu Henry C. Lalrawnkima chuan Sawrkar Scheme pawimawh tak Pradhan Mantri Awas Yojana-Housing for All (Urban) hnuaia hamthatna awm chu a dawng thei tur leh mamawhtu ten an dawn ngei theih nan a theih ang zela hmalak a tul thu sawiin, scheme-in a tum angte hlawhtling taka kalpui a nih theih nan hemi buaipui kawnga thawktu zawng zawngte chu theihtawp chhuah chhunzawm zel tur leh, hamthatna dawng tura thlante chu rinawm taka an hmabakte hlen zel tum turin a chah a ni.

He hunah hian Member Secretary Pi R.Lalnunkimi, DUDO Champhai hnen atangin Housing For All (HFA) hmalak tawhna tlangpui leh District dinhmun tlangpui ngaihthlak a ni a. PMAY-HFA kaltlangin Champhai khawpui chhungah insak tanpuina first installment dawng 958, second installment dawng 688 leh third installment dawng 537 an awm tling tawh thu a sawi a. Heng bakah hian geotag tihfel vek tawh, pawisa dawn veleha pekchhuah mai theih tur first installment hnuaiah mi 4, second installment hnuaiah mi 23 leh third installment hnuaiah mi 56, an vaiin mi 83 an awm mek thu a tarlang bawk.

Meeting-ah hian PMAY-HFA hamthatna dawga tura thlan leh Management Information System (MIS) portal-a thun tawh, zirchianna neih a nih hnua rokhawlhna hrang hrang- hming awm nawn, inhnukdawk, pem, boral, in lo sa tawh, CLSS duh zawk, insakna tur hmun nei lo leh chhan dangte avanga hma la theilo hnuaia mi 41 te chungchang ngaihtuah a ni a. Heng zinga mi 2 te chungchang chu ngun zawka zirchian leh phawt ni se tih a ni a, a dang 39 te chu paihna tur chhan tha tak a awm ni a hriat a nih avangin paih mai turin thuneitu sang zawkah rawtna thlen nise tih a ni a. Heng bakah hian insak tanpuina dawng tura thlan first installment sum pawh dawng vek tawh, chhan hrang hrang avanga hma la lo emaw, hma la chhunzawmlo mi 52 te chungchang pawh ngaihtuah a ni bawk a, heng zinga 1 hian hma a lak chhunzawm leh theih dawn avangin enfiah nise tih a ni bawk.

Chhan hrang hrang avanga paih ngai an awm avang leh a thlakna tur siam a tul avangin meeting chuan a thlakna tura rawtna lut hrang hrangte ngun takin a zirchiang nghal a. Champhai South bial atanga rawtna lut 71 zinga 62 te pawm niin, Champhai North bial atanga rawtna lut 43 atanga 40 te pawm an ni bawk a. Rawtna lut zinga hnawlte hi DPR hmasa lama lo thun tawh 5, hming awm nawn 1, chhungkaw member zinga dawng awm tawhna 6, an vaiin mi 12 te an ni.

Vawiin District Screening Committee on PMAY-Housing for All (Urban), Champhai District thutkhawmah hian Pu Lalnunfela Chawngthu, SDO Sadar, Champhai North leh South MLA aiawhte, Bank hotute leh VC hruaitute bakah member dangte an tel a ni.