Vawiin chhun dar 12 khan DC’s Conference Hall, Keifangtlangah District Swachh Bharat Mission (Gramin) Committee chu an Chairman Champhai Bawrhsap Pu Vanlalngaihsaka IAS hovin an thukhawm.

Vawiin meeting-ah hian Swachh Bharat Mission (Gramin) hnathawh leh hmasawnna hrang hrangte bakah sum dinhmunte ennawn a ni a. SBM (Gramin) hmalaknain kum 2017 atanga January 2018 thlengin Champhai District chhhungah Community Sanitary Complex (CSC) pathum siam niin Waste Colllection Centre/Dumping Ground 8 siam a ni a. Solid Liquid Waste Management (SLWM) hmalakna kalpui anih theih nan hnawm/ bawlhhlawh lakkhawmna (Waste Collection Centre) siamte, Community Sanitary Complex (CSC) sak leh mipuite hnena ODF chungchanga zau zawka zirtirna - Information, Education and Communication (IEC) hnuaia hmalak dan turte rel a ni a. IEC kalpui turin YMA- te nena thawhho nise, Champhai District chhunga VC 80 chhunga In za zela 20 vel tuam chhuah ni thei se tih a ni a.  Heng bakah hian SLWM Consultant tur pawh lak thuai nise tih leh SBM (Gramin) hnuaia Data Entry Operator hlawh tihpun pawh pawm a ni bawk a ni.

Champhai District hi Mizorama ODF District hmasa ber a ni a. December ni 19, 2016 khan SBM (Gramin) ah ODF niin December ni 22, 2016 khan SBM (Urban) bikah ODF a lo ni tawh bawk a ni. Vawiin meeting-ah hian Pawnlera Inthiar awmlohna (ODF) nih hnua hmalak chhunzawm zel tur leh tangkai turte sawiho a ni.

District Swachh Bharat Mission (Gramin) Committee-ah hian PHE Superintending Engineer (SE) chu Executive Vice-Chairman niin Executive Engineer (EE) chu Member Secretary a ni a. Member-ah hian district chhunga MLA, Project Director (DRDA),DEO, EE PHED (Khawzawl WATSAN Division), CMO, DLAO, DSWO (E), DAO, leh DIPRO, District Coordinator, SBM(Gramin), District MJA President, Sub-Hqtr President of YMA,MUP leh MHIP-te an awm a. Vawiin meeting-ah hian member-te hi an tel tha hle a ni.