Vawiin khan FCS&CA Minister Pu John Rotluangliana hovin ama office chamber-ah FCS&CA Secretary Pu HL Rochungnunga, FCS&CA Director Pu Abhjit Vijay Chaudhari, Jt. Director Pu Andrew L.Hnialum leh Supply Department Officials dangte nen LPG harsatna leh thil pawimawh hrang hrangte an sawiho.

Vawiin meeting-ah hian tunlaia MIZOFED bikin District 4 - Siaha, Mamit, Serchhip leh Champhai-ah LPG supply chungchangah harsatna a tawh mek chu sawiho a ni a. Hei hi a chhan ber chu IOC ten carrying contractor-te transportation rate an tihhniam lutuk avanga phur duh tur motor an hmuh zawh mang loh vang a ni tih tarlan a ni a. He harsatna sukiang tur hian Supply Department chuan Minister hovin theihtawp an chhuah mek a, IOC hotute pawh meeting neihpuiin tun dinhmunah hian a theih ang angin heng district-ah te LPG phur turin Department motor-te pawh hman tir mek a nih bakah carrying contractor rawihna tur tender thar pawh tihchhuah a ni tep tawh a ni. Nikum chhung khan ruahtui a tlak tam avangin harsatna sutkian nan State Finance Department chuan Supply Department tanpui nan cheng nuai 11 a pek avangin khaihlak awm lovin tha takin hnathawh a ni a, tunah pawh hian Supply-a harsatna sutkian a nih theih nan Finance Department-ah cheng nuai 8 dil a nih mek thu Supply Minister Pu John Rotluangliana chuan a sawi a ni.

Rampuma Food Security Act hnuaia state tin ten an tih makmawh ‘State Food Commission’ din chungchangah Mizoramah pawh chak takin hmalak mek zel a ni a; Supreme Court-in State tinah he Commission hi din tura thupek a chhuah tawh angin Mizoramah pawh Commission Member-te thlanfel an ni tawh tih meeting-ah sawi a ni bawk.