309/2023-2024

Champhai, the 3rd May, 2023: Vawiin chawhnu dar 4 khan Champhai District Tuberculosis (TB) Forum chu an Chairman Pu James Lalrinchhana, District Bawrhsap hovin DC Conference Hall-ah an thukhawm.

District Bawrhsap Pu James Lalrinchhana chuan TB veite'n damdawi chak tak an ei thin avangin an taksa tih chak a tul thu sawiin, taksa in damdawi eite a lo dawngsawn zawh ve a pawimawh hle a ni, a ti a. Damlote dinhmun a inchen vek loh avangin dinhmun harsa zawkte'n chaw tha mamawh ang an dawn theih nana hmalak chu thil pawimawh tak a nih thu a sawi a. TB veite'n chaw tha an dawn theihna tura CSR kaltlanga hmalak a nih theih nan Company lamte dawra a tul anga hmalak zel tum a nih thu a sawi bawk. 

He hunah hian taksa chak loh avanga TB kai awlsam leh langchhuakte, TB enkawlna damdawi chak tak ei thinte lo dawngsawng thei tura taksa tih chak tul dante sawiho a ni a. Ei tur tha mamawh ang  dawng thei lo te tana penchhuak TB Mitra mi 3 Champhai District-ah an awm mek thu leh, an ni kaltlang hian TB vei damlo 4 te enkawlna tur chaw tha ngaihtuah sak thin an nih thu tarlan a ni a. Company-te CSR fund kaltlanga TB veite chaw tha pek theih dan turte sawiho niin, kum hnih chhung atana project duante thlirho a ni a, a tul anga bawhzui zel ni se tih a ni bawk.

He huna tarlan a nih dan chuan tun dinhmunah  Undivided Champhai District-ah TB vei enkawlna pek mi 78 an awm mek a; heng zinga 8 te hi Multi Drugs Resistance TB (MDR TB) an ni a, kumin January-April chhung khan TB vei hmuhchhuah 42 an awm a ni. Mizoramah chuan TB vei pakhat zelin chaw tha a mamawh angte lei nan thla khatah Rs 700/- zel a seng anga chhut niin, kum khatah Rs 8,400/- vel bawr sen a ngai a ni. Meeting-ah hian Champhai District-ah TB veite ei leh ina tanpuina pe tura inpe TB Mitra an tlem thu leh, hemi kawnga pen chhuak tura mipuite zirtirna pek tam a tul thu tarlan a ni a. Thukhawm chuan District mipuite chu an mamawh khawp chaw tha hmu lo, dinhmun harsa taka awm mek TB veite pui tura penchhuak turin a sawm a ni.

Vawiin Champhai District TB Forum thutkhawmah hian Co-Chairman Pu M.Misael, Addl. DC, Member Secretary Dr. Vanzarliani, SMO Champhai leh Member dangte an tel a ni.