308/2023-2024

Hnahthial the 3^rd May, 2023 - PWD complex Hnahthialah SASCI sum cheng nuai 241.84 senga Circuit House sak tur chu vawiin khan South Tuipui bialtu MLA leh Health Minister ni bawk Dr. R. Lalthangliana chuan lungphum a phum a, "Sorkar in mipuite tana hmasawnna ruhrel a din te hi a thawktu ten tha taka an thawh a pawimawh a ni" a ti.

Health Minister Dr. R. Lalthangliana chuan District thar pathumah District Hospital sak thuai a nih tur thu sawiin, Hnahthial-ah CMO Office sak mek pawh zawh fel tep a nih thu leh kawng hrang hrangin Hnahthial Damdawi In chu tih changtlun mek a nih thu leh Blood bank pawh hman theihin kalpui thuai a beisei thu a sawi bawk a ni.

Covid-19 hrileng leh harsatna hrang hrang karah hmasawnna thawh chhoh zel a nih thu sawiin sorkar awm tawhah Covid-19 hrileng, vawkpul hri, lirnghing, raltlan buaipui ngai leh thil dangte a awm ve lo a ni tiin District tih puitlin pawh a theih ang angin kalpui zel a nih tur thu a sawi a, PWD Sub Division Hnahthial chu a upat tawh bakah District Hqrs a nih bawk avangin Division-a hlangkai thuai turin hmalakna chak takin kalpui mek a nih thu a sawi bawk.

Hnahthial a Circuit House sakna tur lungphum phumna inkhawm hi Pu Lalvenhima Additional DC chuan kaihruaiin District Bawrhsap Pu R. Lalremsanga'n kalkhawmte lawmna thu a sawi a, Er. Malsawmdawngliani, EE PWD Lunglei Building Project Division chuan Technical report a pe a, Circuit House hi a chhawnga sak tur niin Ni 30.09.2024 ah zo tura ruahman a nih thu a tarlang a ni.