Vawiin khan Champhai DC Pisa-ah Special Summary Revision of Photo E/Roll, 2020 neihna tura Draft Electoral Roll thar ber chu District Election Officer Pu S.L Naveen chuan tlangzarhin, Party aiawh te hnenah Draft Electoral Roll, 2020 Copy khat theuh a hlan nghal a ni.
District Election Officer Pu S.L Naveen chuan Draft Electoral Roll siam that leh tlangzarh chu kum tina kalpui thin anih thu sawiin, siam that ngai leh thu thlen duh a awm anih pawhin hun bi tuk chhunga thlen turin a ngen a. Electoral Roll dik leh felfai tak buatsaih anih theihna tur kawngah District mipuite tawiawmna a ngen a ni.
Election Officer Pu Lalnunfela Chawngthu pawhin thusawiin, Undivided Champhai District chu Electoral Roll thuah faina an tih mai, Elector Verification Programme (EVP) tunhnaia kalpui zawk taka Mizoram District-te zinga titha ber anih thu sawiin, EVP kaltlanga Electoral Roll thuahfai hna hmang hian nikum aiin kumin Draft Electoral Roll tlangzarh takah Voter 1015 a a kiam thu a sawi a. EVP titha ber nih theihna kawnga Election thawktute, Media leh khawtlang mipuite tawiawmnaah lawmthu a sawi bawk.
Draft Electoral Roll 2020 tlangzarhna a kalkhawmte cuan EVP titha ber District kan ni chu chhuanawm an tih thu leh Inthlan vuakveta inbiakpawhna tha zawk a awm theihna tura hmalak pui turin Bawrhsap an ngen nghal bawk a ni.
Vawiina Draft Electoral Roll 2020 tlangzarhin a tarlan danin Undivided Champhai District huamchhunga Assembly Constituency 5-ah Vote nei Mipa 42,207 leh Hmeichhia 43,156 an awm a. Vote nei zawng zawng hi a vaiin mi 85,363 an ni a, Mipa voter aiin Hmeichhe voter 949 in an tam zawk a ni. District chhungah Polling Station 137 awmin, Polling Station 1 ah voter 623 zel awm ang a chhut a ni a. MLA Constituency zingah 23-Champhai North A/C-ah voter 18,543 awmin a tam ber a, 25-E. Tuipui A/C-ah voter 14,890 awmin vote nei an tlem ber a. Service Voter awm 746 zinga 742 chu Mipa niin, a dang 2 chu Hmeichhia an ni a. General Voter leh Service Voter belhkhawm hi 86,109 a ni.
Special Summary Revision 2020 ah hian qualifying date chu January Ni 1, 2020 a ni a, hemi ni a Kum 18 tling hman tur India khua leh tui (citizen) dik takte chuan Electoral Roll-ah luh an dil thei ang. Ruahman dan chuan Special Summary Revision of Photo E/Rolls 2020 hnuaiah December Ni 16, 2019 atanga January Ni 15, 2020 chhungin Electoral Roll a inthun, paih, insawn leh siam that, dilna thehluh theih hun chhung atan hun hawn a ni ang a. Dilna lutte January Ni 27, 2020 hmain tihfel vek hman tur a ni a. February Ni 4, 2020 thlengin Database te siam that niin supplement-te chhutchhuah vek hman tum a ni a. Electoral Roll siam that leh a thar ber Final Publication of Electoral Roll chu February Ni 7, 2020 ah neih tur a ni ang.
Dilna hrang hrangte hi online in nvsp.in ah thehluh theih a ni a, Moblile app Voter Helpline hmangin a thehluh theih a. Veng/Khua tina BLO te hnenah a thehluh theih a. DC, SDO (Civil) leh BDO office-ah te a thehluh theih bawk. Vawiin a Draft Electoral Roll tlangzarh tak hi mahni bialtu Booth Level Officer (BLO) hnenah en theih a ni a. DC, SDO (Civil) leh BDO Office-ahte en theih a ni bawk ang. Tin, CEO website ceo.mizoram.gov.in ah a en theih bawk ang.
