Kum 2020 atana Lawngtlai District-a Assembly bial pathuma draft electoral roll chu Nimin (16.12.2019) khan Lawngtlai District Election Officer, Lawngtlai Bawrhsap ni bawk Pi Shashanka Ala, IAS chuan a office chamber-ah a tlangzarh a. Draft roll hi political party ai awhte hnenah a hlan nghal.

Draft electoral roll tlangzarh tak atanga a lan danin, 36-Tuichawng (ST) A/C bialah vote nei mipa 15852 leh hmeichhia 15520, an vaiin mi 31372 an awm a; 37-Lawngtlai West (ST) A/C bialah vote nei mipa 13524 leh hmeichhia 13402, an vaiin mi 26926 an awm a; 38-Lawngtlai East (ST) A/C bialah voter mipa 11626 leh hmeichhia 12374, an vaiin mi 24000 an awm a; assembly bial pathumah hian vote nei mipa 41002 leh hmeichhia 41296, an vaiin mi 82298 an awm a ni.

Summary revision neih turah hian sawi duh neite tan kum thar January ni 15 thleng hun hawn a ni a. February ni 7, 2020-ah final electoral roll chu tar chhuah tura tih a ni.

Hemi rual hian Tuichawng biala polling station 62 awm saah a thar 8 hawn belh niin, polling station 70 a awm tawh dawn a; Lawngtlai West-a polling station awm sa 68-ah a thar 1 hawn belh niin, polling station 69 a awm tawh ang a; Lawngtlai East-a polling station awm sa 35 baka a thar hawn belh 7 nen polling station 42 awm tawhin, Lawngtlai District chhunga bial pathumah hian a vaiin polling station 181 a awm tawh dawn a ni.