Vawiin khan Champhai DC Conference Hall-ah District Level Standing Committee an thukhawm a, He hunah hian Special Summary Revision of Photo E/Rolls 2019 neihna tura Draft Electoral Roll thar ber chu Pu Liansangzuala Chhakchhuak, Addl DEO Champhai chuan a tlangzarh a. Party aiawh tinte hnenah Draft Electoral Roll  Copy khat theuh a Bu leh CD-in a hlan nghal a ni.

Pu Liansangzuala Chhakchhuak chuan kumin MLA General Election tluang tak leh felfai taka neih zawk taka Mipui, Political party, NGO leh sawrkar Official-te thawhhona chu fakawm a tih thu a sawi a. Nakum maiah Lok Sabha inthlan neih anih leh dawn avanga tun atanga inpuahchahna kalpui chhoh a ngaih thu sawiin, inpuahchahna kawnga Election kaihhnawih thil hrang hrangahte dik tak leh felfai zawka thil tih anih theihna turin mitinte tawiawmna a ngen nghal a ni.   

Pu Lalremruata  Kullai, Election Officer, Champhai chuan  Draft Electoral Roll  tihchhuah tak sawizauin Roll-a la awm ve lote tan January Ni 1, 2019 qualifying date a hmanga  inziahluh theih anih thu a sawi a. Heng bakah hian Roll atanga paih emaw, siam that emaw tih theih anih thu  sawiin,  nikum January ni 1, 2018 hnu lama piang Roll-a la awmlote tana luh theihna anih avangin awm remchanglote pawh an chhungten an dil sak sak  thei a ni, a ti a. Khua leh tui Vote nei thei tawh phawt ten an neih a, paih ngaite pawh paiha siamthat ngaite nena siam that zel anih theihnan BLO te kaltlanga Special Drive  neih anih thin thu a sawi bawk a. Electoral Roll dik leh felfai neih theihna kawnga YMA te tawiawm thinna chu fakawm a tih thu a sawi a. Election kaihhnawih thiltihah langtlang taka tih a ngaih avangin Political party, NGO, Media ten  sawmna ngaipawimawha  an tawiawm thin avangin lawmthu a sawi bawk.

Vawiina Draft Electoral Roll tlangzarhin a tarlan danin Champhai District-a Assembly Constituency 5-ah  Vote nei Mipa 41,910 leh Hmeichhia 42,795 awmin a vaiin vote nei thei mi 84,705 an awm mek a, Mipa voter aiin Hmeichhe voter 885 in an tam zawk a ni. District chhungah  Polling Station 137 awmin, Polling Station 1 ah voter 618 awm zel ang a ni a. MLA Constituency zingah 23-Champhai North A/C-ah voter 18,488 awmin a tam ber a, 25-E. Tuipui A/C-ah voter 14,839 awmin vote nei awm tlemna ber a ni.

Polling Station malah  chuan  24/12-Champhai Vengthar Polling Station, 24- Champhai South Assembly  Constituency- ah voter 1,175 awmin a tam bera, 21/24- Taitawkawn, 21- Lengteng Assembly Constituency-ah voter 54 awmin a tlem ber a. 22-Tuichang A/C, 23-Champhai North A/C leh 24-Champhai South A/C ah te Mipa aiin Hmeichhe vote nei an tam zawk a ni. Sipai tang lai Service voter 638, Mipa 636 leh  Hmeichhia 2 an awm bawk a ni.

Ruahman dan chuan Special Summary Revision of Photo E/Rolls 2019 hnuaiah December Ni 28, 2018 atanga January Ni 25, 2019 chhungin dilna, thuthlen duh leh sawi duh neite tan hun hawn a ni ang a. Chung thu thlente chu Fenbruary Ni 11, 2019 hmain tihfel vek hman tur a ni a. February Ni 18, 2019 thlengin Database te siam that niin supplement te chhhutchhuah vek hman tum a ni a. Electoral Roll siam that leh a thar ber Final Publication of Electoral Roll chu February Ni 22, 2019 ah neih tur a ni ang.

Special Electoral Summary of Photo E/Rolls 2019 hnuaiah Qualifying date hi 01.01. 2019 a ni a. Hemi hmang hian 01.01.2001 leh a hmalama piang kum tling tharte  thunluh bakah insawn te, a diklo lai tih dikte leh Roll-a chuang tawhlo turte hmimg  paihte pawh tih nghal tur a ni a. Tun tum summary Revision-ah hian Repeated/Multiple Entries /Demographically Similar Entries (DSE) enfiah leh paihte, E/roll-a diklo Logical Error hrang hrang tih dikte, Permanently  Shifted Elector (Pem hlen tawh turte hming  paih)  turte pawhin hmalak tur a ni a, Mitthi tawh hming paih  (delete)  nan Death Certificate hman thin  tur a ni ang.  

Roll-ah hian Rualbanlote ngaihpawimawh an ni a, Accessible Election tih thupui hmangin ngaihpawimawh an ni a, Roll-ah pawh VIP te nen chhinchhiah bik an ni ang.  District Election Office, Champhai chuan Roll dik leh felfai neih theihna turin Official-te, BLO, NGO leh mipuite tawiawmna leh finchhuahna a ngen a ni.

Attachment

  • Loading attachment...