No.2829/2021-2022
Aizawl the 1st November, 2021: Special Summary Revision of Photo E/Rolls, 2022 neihna tura Draft Electoral Rolls, Champhai District thar ber chu Election Officer Pu Lalnunfela Chawngthu chuan vawiin chawhma khan DC Conference Hall-ah tlangzarhin, Political party aiawhte hnenah Draft Electoral Rolls, 2022 tlangzarh copy khat theuh sem chhuah a ni.

Pu Lalnunfela Chawngthu chuan Special Summary Revision of Photo E/Rolls, 2022 kalpui tura Draft Electoral Rolls tlangzarh a ni ta chu lawmawm a tih thu a sawi a. Kum hmasa lamah dilna hrang hrang thehluh hun hawn chhungin dilna lutte nghahkhawl phawt a nih hnuah dilna hun tawp hnuah chauh ngaihtuahna hun hearing AERO leh ERO te remruatnaa neih thin a nih thu sawiin, kumin atangin ECI duhdan angin dilna hawn hun chhung a hearing pawh kalpui pah zel tum a nih thu a sawi a. Vote nei thar tura dilna, paih, insawn leh tul dang siamthat ngaite chu vawiin November ni 1 atanga November ni 15, 2021 chhung ngeia bialtu BLO emaw, Voter Helpline Application-ah te ngaihvena bawhzui tura chahin, November ni 16 atangin hearing kalpui chhoh tum a ni, a ti a. November ni 30 thleng dilna hun hawn a nih dawn avangin November ni 15 hnu lama dilna lut mahni veng /khua a hearing nang hman lote chuan District Election Office-ah hearing an neih theih dawn tho thu a sawi bawk.

Election Officer chuan Voter Helpline Application (VHA) hmanga dilna siam theih a nih thu pawh sawiin, ECI in online hmanga dilna siam a ngaihpawimawh thu leh hmang tangkaia ngaihven turin mipuite, abik takin kum tling tharte a a chah a. Kum tling tawh roll-a inthun tur zawng zawgte chu hun bituk ngaipawimawha a tawp hun nghak kher lova a hmalama ngaihven theuh turin a chah a. Dilna thehluh leh hearing neih hun chhungin document felfai leh dik tak chauh keng theuh turin a ngen nghal bawk a ni.

Thusawitu dang Pu C.Lalnghakliana, DRO Champhai chuan Roll hearing laiin District Election Office nena tangkawpin document lem dapchhuah kawngah theihtawp chuah tum a nih thu a sawi a. Khawtlang hruaitute leh mipuite chu document lem siamchawp man chhuah a nih theih nana tanrualpuiah sawmin, dan anga hmalak zel tum a nih thu a sawi bawk.

Draft Electoral Rolls 2022 tlangzarh takin a tarlan danin Champhai District chhunga Assembly Constituency 3-ah vote nei mi 54,117 (Mipa 26,521 leh Hmeichhia 27,656) an awm a, Mipa vote nei aiin Hmeichhe vote nei 1,135 in an tam zawk a ni. Heng bakah hian Service voter 449 (Mipa vek) an awm bawk a ni. Assembly Constituency zingah 24-Champhai South A/C ah vote nei mi 19,622 (Mipa 9,435 leh Hmeichhia 10,187) awmin an tam ber a, 23-Champhai North A/C in dawtin vote nei mi 19,226 (Mipa 9,365 leh Hmeichhia 9,861) awmin an dawt a, 25-E.Tuipui A/C-ah voter 15,329 (Mipa 7,721 leh Hmeichhia 7,608) awmin vote nei awm tlemna ber a ni.

Kumin January ni 20 a Final Electoral Rolls, 2021 tlangzarh (voter 54,227) nena khaikhinin vawiina tlangzarh Draft Electoral Rolls, 2022 (voter 54,117) ah hian vote nei zat 50 (-0.9%) in a kiam a. Continuous updation kaltlanga dilna lut 55 pawm a ni a, awm nawn 9 leh insawn 83 te paih niin, paih zat hi avaiin 92 a ni.

Special Summary Revision of Photo Electoral Rolls, 2022 ah hian qualifying date chu January ni 1, 2022 a ni a, hemi ni a kum 18 tling hman tur India khua leh tui (citizen) dik takte chuan Electoral Roll-a inthun dil theih a ni a, hemi rual hian siam that ngai siam, paih ngai paih leh insawn duhte siam fel theihna hun pawh hawn a ni a. Ruahman dan chuan Special Summary Revision of Photo E/Rolls 2022 hnuaiah November ni 1, 2021 atanga November ni 30, 2021 chhungin Claims and Objection - Electoral Roll-a inthun, paih, insawn leh siam that, dilna thehluh theih hun chhung hawn a ni a, hemi hun chhung vek hian a remchan dan angin hearing neih chhoh zel a ni ang. December ni 20, 2021 atangin dilna leh rawtna thlente chinfel a ni ang a, database siamthat leh supplement chhutchhuahte tihfel a nih hnuah January ni 20, 2022 hian Electoral Roll thar ber tlangzarh tum a ni.

Dilna hrang hrangte hi veng/khaw tina BLO te bakah online in nvsp.in leh Moblile App- Voter Helpline Application (VHA) hmangte a thehluh theih a ni bawk a. Vawiina Draft Electoral Rolls, 2022 tlangzarh hi DEO Office, mahni bialtu ERO/AERO/ Booth Level Officer (BLO) hnenah a en theih mai bakah CEO website ceo.mizoram.gov.in ah a en theih bawk a ni.

Special Summary Revision of Photo Electoral Rolls, 2022 kalpui chhoh mekah kum hmasa aia nasain Birth Certificate, Voter’s ID leh document dang diklo leh a lem siam thin chhuichhuah kawngah tanlak tum a a ni a. District Election Office, District Research Office leh Police tangkawpin document lem leh diklo zawnchhuah beihpui an thlak tel dawn a, dan bawhchhia man chhuah an awm a nih chuan an chungah dan anga hremna lekkawh a ni ang.