Vawiin khan Digital India Week denchhenin Mizoram E-Governance hnuaia E District Champhai chuan Govt. Champhai College ah E-district application leh Social Media & Cyber Security chungchangah Workshop a buatsaih.
He workshop hi Pu Lalthamawia Bawlchhim, Asst Prof in a kaihruai a. Pu Malsawmtluanga, Champhai E-district Manager chuan E-District chungchang leh hnathawh dan te sawiin, E-District chu National E-Governance hnuai Project pakhat a nih thu leh, kum 2016 May ni 18 atanga din tan niin, man man zawka mipui vantlangin an mahni awmna khua leh veng atang ngeia rintlak leh langtlang zawka sorkar an dawr theihna tur ruahmanna a nih thu a sawi a. E-district hi October 2014 atanga kalpui tan niin beisei phak bakin mipuiin an chhawr thu leh, mipui ten hei aia nasa a an chhawrtangkai zel a beisei thu tarlangin, mi 3656 in Online a Certificate an lak chhuah tawh thu a tarlang. Pu Malsawntluanga chuan Certificate lak chhuah dawn a document ngai leh thil pawimawh te tarlangin, online-a Certificate dil dan te a sawifiah bawk.
Workshop-ah hian Pu Zairimawia, Asst. Engineer, NIC, Champhai hnen atangin Social Media leh Cyber Crime chungchangah zirtirna ngaihthlak a ni a. Social Media leh Cyber Crime lamah kan hriatna a la zau tawk loh avangin mi tam takin harsatna an lo tawk tawh thin a ni tiin, Facebook leh Whatsapp leh Social Media danga thlalak leh thu kan thawn darh te hian harsatna min siam thei a ni tih hria a fimkhur taka khawvel changkanna hi hman thiam a tul a ni, a ti.
Tukin zing khan Champhai Addl. DC Pu R. Vanlalsawta hovin E-district content management Software leh Digital India Week hawnna e-district Office, Keifangtlang ah neih a ni a. E-District hnuaiah hian Champhai District chhungah Common Service Centre (CSC) 49 a awm mek a, CSC te kaltlang hian Sorkar office kal kher loin mipuite'n Certificate an la chhuak thei a. E-district hnuaiah hian Service chi hrang hrang 32 leh SSDG hnuaiah Service hrang hrang 21 kalpui tura ruahman mek a ni.
