Sorkar Department pahnih Home Department leh Information & Public Relations chuan mipui tana rawngbawlna kawng tichak turin inhnaih lehzuala thawhho nise an ti.

Vawiin khan I & PR Secretary Pi Rosangpuii Office Chamber-ah Department pahnih aiawhte hi an thukhawm a. He hunah hian Secretary,  I & PR chuan an Department chu sorkar kaihza venga fimkhur leh dik taka thu kal lam, haw lam mipui hnena an puanzar thin dante a sawi a. Mizoram Police ten suahsualna dona leh misual man kawnga an hnathawhte vantlang hriata puanzar danah thudik leh belhchian dawl pekchhuah anih theih nan fimkhur taka inrawntawn thin nise tha a tih thu a sawi a ni.

Suahsualna dona ah te, hnam, chi leh chi inkara innghirnghona chawk tho thei thilthleng a awmin a bik taka fimkhur a ngaih thu te meeting ah hian sawilan a ni a, mipui ten thu dik, innghahna tlak rang taka an hriat theih nan te, rinthu leh zeldin thu avanga mite rilru chawktho thei thute vawrhdarh a nih loh nante tanlak tha an ti a ni.

Sorkar chuan thu dik belhchian dawl puangchhuak thin mahse, a changa Social Media lam Facebook leh Whatsapp ah te a thu thangva belhchian dawl tawklo leh mi rilru tina thei thu thehdarh a awmfo chu pawi an tih thu pawh meeting ah hian sawilan a ni a. Hemi kawngah hian Social Media hmangtute pawh fimkhur turin an ngen nghal a ni.

Tunhnaia New Delhi a DGP/IGP intawhkhawma an ngaihmawh, India ram Police te film leh media hrang hranga rintlak tawklo ang thaw a tihlan fo thin chungchang chu, hei hi Mizoram bikah chuan a la thleng ve lo niin meeting chuan a ngai a, Mizoram Police te chu vawiin ni thlenga suahsual do kawnga innghahna tlak an ni chu lawmawm an tih thu pawh an sawi a ni.