Sorkar Laipuiin a duan angin rampumah July ni 1-7, 2015 chhung hian ‘Digital India Week’ hman tur a ni a, nimin tlai dar 4:00 khan India Prime Minister Pu narendra Modi chuan New Delhi-ah he Week hi a hawng tawh a. Vawiinah hian ram hmun dangah Digital India Week hawnna leh a kaihhawih programme hrang hrang an hmang zui thung a ni. Mizoramah pawh ‘Digital India’ hnuaiah vawiin khan Aizawl leh District dang zawng zawngah he Week hawnna hman niin e-District Centre hawnna a rualin neih nghal a ni.

Lunglei-ah pawh vawiin chawhma dar 10:30 khan Lunglei DC Office Complex chhungah e-District Facilitation Centre hawn a ni a, hemi rual hian Lunglei Addl. DC Pu H.Lianzela chuan ‘Content Management Software for District Administration’ a hawng nghal bawk. He e-District Centre atang hian heng - Income Certificate, Tribal Certificate, Residential Certificate - te DC Office chuan a pechhuak tan tawh a. Heng Certificate dil duhte tan Office pan kher ngai lovin online-in edistrict.mizoram.gov.in ah application an thawn chu uluk taka enfiah a nih hnuah online bawkin an duh Certificate chu thawn theih an ni. Vawiin veka hawn Lunglei DC Office hnuaia District Administration website www.dclunglei.mizoram.gov.in chu a duh atan tlawh theiha siam a ni a, hei bakah Mizoram sorkar hnuaia ruahmanna hrang hrang website-a dah chu mizoram.gov.in ah en theih a ni bawk.

Digital India Week Programme hnuaiah vawiin khan dar 11:30 atangin Sub-Hqrs YMA Conference Hall, Venglai-ah ‘Workshop on Social Media & Cyber Security’ neih a ni a. He Workshop Lunglei DI&PRO Pi Mina Zoliani kaihhruaiah Lunglei Addl DC chuan rampumah ‘Digital India Week’ hnuaia ruahmanna hrang hrang sorkain a siam chu a sawifiah a, he Project hnuaiah hian digital infrastructure siam kawngah nasa takin hmalak a ni ang a, Gram Panchayat/Village Council zawng zawngte chu kum 2019-ah internet broadban connection pek vek tum a nih thu a tarlang bawk. Digital India-in a tum ber chu Sorkar leh a khua leh tuite inzawmna chu tunlai thiamna sang tak hmanga tihpn a, digital literacy tihsan a tum a, Aadhar Card leh kan mobile number-te thlunzawm vek a, mipuite hnena awlsamna nasa tak siam tum a ni, a ti. He Programme hian tlawm zawka smartphone kan neih theina tur kawng pawh a sial ngei tura beisei a ni a, Reliance Industries neitu Pu Mukesh Ambani chuan Digital India lam hawi hian Cheng vaibelchhe nuai 2.5 lai a pe invest) dawn a, TATA Group te pawhin kumin ringawtah IT mithiam 60,000 an lak belh tur thu an puang bawk a ni tih Pu Lianzela hian a tarlang a. Smartphone nei zo lote tan ‘Wi-fi Hotspots’ te din tum a ni a, heng hmunahte hian a thlawnin mipui tan internet hman a ni thei tawh ang, a ti bawk.

Vawiin Workshop-ah hian ‘Social Media & Cyber Security’ thupui hmangin Resource Persons  1).Pu F.Lalrinawma, Scientist C, NIELIT leh 2).Lunglei SP Pu Zosangliana ten thu an sawi a,mitin tan social media hrang hrang (entir nan : wtsapp, facebook, etc) leh internet him zawka hman dan tur chungchang kalkhawmte an hrilhfiah a ni. Vawiin Workshop-ah hian sorkar officials bakah NGO leh Zirna in hrang hrang atangin an rawn tel tha hle a, zawhna zawt tha berte hnenah lawmman te pek a ni.

Lunglei e-District Facilitation Centre Manager Pu C.Llathlengliana pawhin e-District Centre hnathawh dan leh mipuiten an chhawr tangkai dan tur chungchang a sawi a. Lunglei SDC Pi Carolyn LB Khiante-in lawmthu sawina hmangin hun a khar a ni.