Nimin khan District Fisheries Office, Kolasib chuan Zampuimanga Hall, Bairabi ah Kolasib District huamchhung Luidunga nungchate humhalh tha YMA Branch-te chawimawiin a titha te hnenah lawmman an hlan a. He programme ah hian luidunga nungcha humhalh chungchanga inhrilhhriatna Awareness Campaign neih a ni bawk.
He hun hi District Fisheries Development Officer Pu C. Laldawngliana chuan kaihruaiin Pu Chawngthanmawia, President Sub- Hqrs. YMA, Kolasib leh Pu C. Liankunga, Sub-Hqrs. YMA Kolasib ten an hmanpui a ni.
Saipum Branch YMA, Bairabi North Branch YMA, Bairabi South Branch YMA leh Bilkhawthlir Joint YMA te hi luidunga nungcha humhalh tha YMA Branch a thlan niin lawmman cheng 40,000 leh thuziak hlan theuh a ni. Heng YMA Branch te hian hemi kawnga hna an thawh dan leh an hmalak dan tlangpui te sawiin hun an hmang bawk a. Lawmman latute hian an luidung an humhalh ah te eng hmanrua mahin tuia cheng nungchate man an phal loh thu tarlangin an humhalh chunga pawikhawih te chu khawtlang hriatah an puanzar thinin an puangzar zel dawn tih an sawi bawk.
