Vawiin chawhma khan Champhai DC Conference Hallah kumin MLA inthlanpui tur atana inpuahchahna te ECI hotute nen thirho a ni a. He hunah hain Pu Debashis Das, IAS, General Observer for 21-Lengteng (ST) AC & 22-Tuichang (ST) AC, Pu Narander Kumar Meena IAS, General Observer for 23-Champhai North AC, 24-Champhai South AC & 25-East Tuipui AC leh Pu Saroj Kumar Thakur, IPS, Police Observer te pawh an tel a.   ECI Delegates lokal te hi Pu Sudeep Jain, Deputy Election Commissioner chuan a rawn hova, a ni bakah hian Pu Neeraj Thakur, State Police Nodal Officer, Pu SB Joshi, Secretary ECI, Pu Krishna Mohan Uppu, Addl CEO Mizoram leh Pu CC Lalchhuangkima, Deputy CEO Mizoram te chuan Champhai hi an rawn tlawh a ni.

Dr.Naveen Aggarwal District Election Officer Champhai chuan ECI team ten Champhai an rawn tlawh  chu lawmawm a tih thu leh thinlung taka an lo  lawm thu a sawi a. Kumin inthlanpui neih tur atana Champhai District Election Office hmalakna leh inpuahchahna hrang hrangte Power Point Presentation hmangin a tarlang a. Champhai chu District muanawm tak anih thu leh inthlanna felfai tak neih anih ngei a beisei thu a sawi a. 

Pu Lalthiamsanga Sailo, SP Champhai pawhin venhimna thawktu leh dan kengkawhtute hmalakna tlangpui a tarlang bawk a. Champhai District chhungah inthlan kaihhnawih buaina lian tham a awm thin loh thu sawiin Silai tun pawh 90% chuang anih a beisei thu leh ramri kaltlanga inthlan tibuai thei thil a awm loh a beisei thu a tarlang bawk.

Champhai District chhunga Assembly constituency panga atanga RO te hnen atangin zawhna leh hriatfiah duhte zawhna hun siam niin ECI hotuten an lo chhang zel a, hun hlawkthlak tak hman ho a ni.

Review meeting zawh hnu hian ECI Team member te hian DC Officea EVM Strong Room tlawhin an enfiah a. Inthlan zawh hnua Vote chhiarna tur DC Complex Badminton Hall, Keifangtlanga mi chu tlawh lehin a hmunah district official ten vote chhiar dan tur leh ruahmanna an siam chhinte a lem nen an entir a. Chumi hnuah Polytechnic,Champhai Tlangsama Central Armed Police Forces (CAPF) te inkhuarna hmun kalchilhin an khawsak dante an enfiah leh a. Hemi zawh hnu hian ECI Team te hi Aizawl lam panin an let leh nghal a ni.

Vawiin inthlan inpuahchahna review meeting-ah hian Distrct Election kaihhnawih fawng chelhtu pawimawh tak takte leh media te an tel a ni.