Vawiin chawhma khan Lunglei DC Conference Hall-ah kumin MLA General Election vil tura Election Commission of India in a ruat Lunglei District Observer-te leh election kaihhnawih official ten inthlan hmachhawn tura inpuahchahna an sawiho. Meeting-ah hian Lunglei DC Dr Ankita Chakravarty, SP Pu C. Lalthanmawia leh Assembly Constituency pasarih RO leh ARO te an tel a ni.
Meeting kaihruaitu Lunglei DC Dr Ankita Chakravarty chuan election hmachhawn tura inpuahchahna chak taka kalpui mek zel a nih thu sawiin electric connection, inthiarna thianghlim, ramp, inbiakpawhna (mobile connectivity) leh kawng siam that hna te Polling Station hrang hrangah kalpui a nih thu a sawi a. Mobile network awmlohna hmunah te MPRO nen thawkhoin wireless set hman tum a nih thu a tarlang bawk. Election duty tur official te tan training thawh khatna zawhfel tawh niin inthlanna hmanrua EVM leh VVPAT-te First Level Checking (FLC) neih a ni tawh a, November ni 18-ah hian ECI atangin Engineer pathum (3) in an rawn endik leh dawn a ni. ECI hmalakna hnuaia Application hrang hrang – Suvidha, cVigil, Genesys leh Samadhan-te Lunglei District-ah hman anih ve thu a tarlang bawk. Inthlanna muanawm leh felfai tak a awm theihnan Lunglei SP Pu C. Lalthanmawia kaihhruaina hnuaiah Police Deployment Plan mumal tak siam a nih thu a sawi bawk.
Lunglei District inthlan vil tur hian Election Commission of India in Observer paruk (6) a ruat a. Vawiin meeting ah hian General Observer pathum - Mr NS Prasanna Kumar, IAS, Mr Armstrong Pamei, IAS, Mr Chakravarthi Mohan, IAS leh Police Observer Mr Sangakal Veeresh Prabhu, IPS te an tel a. Observer-te chuan zawhna an neih hrang hrang te zawtin election hmachhawn tura Lunglei District inpuahchahna chu tha an tih thu an tarlang a. Observer te chuan inthlanna dik leh felfai taka awm theihnan ECI in nasa takin tan a lak thu sawiin mipui nawlpuiin inthlannna muanawm leh hlauhna awmlo an neih chu ECI duhdan a nih thu an tarlang. Election Observer te hian Lunglei khawpui chhunga Polling Station te an tlawh kual tan mek a, karleh lamah an Constituency chan te tlawh tura zin chhuah an tum a ni.
