No.3365/2019-2020

Tunlai hrileng mek Covid-19  laka invenna tura lockdown kalpui anih hnua ei leh bar lama harsatna awm theite chinfel dan tur (Food Chain Supply)  leh Champhai district chhunga pawn lam mi tangkhang mekte chhawmdawl dan tur  chungchang chu vawiin khan I&PR Conference Hall, CHANEM-ah District Level Task Force on Covid-19  thukhawm chuan a rel. 

Meeting kaihruaitu  Pu Mark Lalthanliana, Addl DC Champhai chuan ei leh bar mipuite’n an tlakchham lohna turin theihtawp chhuaha hmalak a ni a, tun dinhmunah  thlaphanna tur a awm lo a, nakin zel atan pawh chak taka hmalak zel a ni, a ti a. Lockdown hun chhung a la rei dawn avangin mipuite chu dawhthei taka awm  tur leh  hotute thu zawm turin a ngen a. Mahni veng theuha hmalatu Village Level Task Force-te pawh   rilru dai leh ngaihtuahna fim tak hmang thin turin a fuih a. Thahnemngaih luat vanga rilru inhliam palh chang pawha rilru zau tak pu chunga  inhrethiam tawn zel turin a ngen a.  Mahni veng leh khua bil chauh inngaihtuah lova, mizo takin midangte hmakhua ngaia ngaihtuahna zau zawk seng zel turin a chah nghal a ni.  

Champhai SP Pu Rex Zarzoliana Vanchhawng chuan   Covid-19  darh zel tur venna tura lockdown puan chuan nitin mamawh ei leh bar leh chakkhai lam a ngaipawimawh em em a ni, a ti a. Village Level Task Force-te hmalaknain veng leh khaw tinahte chak taka hmalak mek zel nimahse nakin zel ngaihtuah tel a ngaia, chakkhai lam nan vawi leh khatah  inhawng huk silo, inkharkhip lutuk lo deuha venhimna mumal tak hnuaiah fimkhur thei ang bera chakkhai lam leh dap dan ngaihtuah angaih thu a sawi a. Champhai khawpui mai bakah thingtlang lamte dinhmun thlenga ngaihtuaha   enzui angaih thu sawiin, hemi kawngah hian Local Level Task Force leh Police lamte tang ruala  ruahmanna siamin, felfai taka kalpui anih theih a beisei thu a sawi bawk. 

Pu Lalnunfela Chawngthu, SDO Sadar-in thurel tur tlangpui a sawifiah  hmasak  hnuah,  Pu Vanlalvuana Rokhum, SDHO Champhai leh Pu George Lalthanngura, DAO Champhai te’n thlai rah leh  hnah dinhmun tlangpui an sawi a. Meeting chuan nitin mamawh chawhmeh, thlai hnah leh rahte a theih ang anga lakhawma rualkhai taka semzai anih theihna tura hmalak nise a ti a. Hemi buaipui tur hian  Pu Vanlalvuana Rokhum, SDHO, Horticulture Department  Champhai chu Nodal Officer atana ruat niin, Village Level Task Force-te nen  thlai hnah leh rah lak khawm chungchang leh  a tul ang zela  semzai dan tur an ngaihtuahho thin dawn a ni.  Thlai hnah leh rah la tura feh pawh Village Level Task Force-te ruahmannain  a tul ang zela kalpui nise tih niin,  district pawn lam atangin Buhfai, Dal, Alu, Tel leh mamawh dangte district administration hmalaknaa ngaihtuah zel tum anih thu tarlan a ni bawk. 

Meeting-ah hian Covid-19 kaidarh zel danna tura  lockdown puan anih avanga pawn lam mi Champhai District chhunga tangkhang mekte chhawmdawlna pek dan tur chungchang pawh ngaihtuah ho a  ni a. Sawrkar thuchhuak  bawhzuiin  pawn lam mi  tangkhang mekte chu enfiaha, a  tul anga chhawmdawlna pek nise tih a ni a. DC office lam atangin finfiah dan tur lehkha mumal tak siam a, chu mi behchhan chuan Village Level Task Force te’n an mahni huamchhung theuhah zirchianna lo nei se,  an hming, address, hnathawh, harsatna tawh mekte leh tul dangte  lakkhawm anih  hnuah a tul anga chhawmdawlna pek  nise  tih a ni a. Heng bakh hian VLTF guideline siam chhuah tharte zirchian niin, a tul anga enfiah leh nise tih a ni bawk. 

Meeting-ah hian District Administration, Police, H&FW, Agriculture, Horticulture    hotute, SYMA hruaitu leh Town Area VC-te an tel a ni.