No.3364/2019-2020

Tunlai a khawvel ram hrang hrang tuamtu hrileng Novel Coronavirus laka Mizoram humhimna turin leh kan inven tlan theihna turin Mizoram sawrkar leh mipuiin hma kan la nasa em em a. Khaw tinah leh vengtinah kan him tlanna turin mitinin theih ang tawp an chhuah a, discipline pawh a tha hle a ni. Sawrkar lamin hma a lakna thenkhat hriat kimloh a awm thei a. Chungte chu hengte hi a ni:

 1. Finance: Sum leh pai thu ah Chief Minister Pu Zoramthanga, Finance Minister ni bawk chuan he natna laka Zoram mipui an him theih nan sawrkar chuan ui hauh lovin a tul ang zela sawrkara sum awm chu hman a nih tur thu sawiin, chutiang ang tak chuan Finance Department a thawktute pawh instruction a pe a. Chumi hnu chuan State Level committee te, health department leh he hmalaknaa department tel dangten ruahmanna siamin, cheng vaibelchhe 5 (nuai 500) chuan mamawhte a khuh thei dawn nia an sawi angin, Chief Minister instruction in Finance Department chuan reilote chhungin cheng nuai 500 chu sanction a ni. 

2. Health Equipment lei leh Lakluh dan kawng:
Damlo enkawltuten an invenna tur mamawh PPE (Personal Protective Equipment) mamawhna avangin Delhi a Resident Commissioner te chu a hmunpuiah a lo zawng a, an hmuh theih ang ang a tam ber lakhawm tur a hrilh an ni. Hun tepter tawh taka bungraw tam tham tak inthawn tur chuan thlawhna mamawh a ni a, amaherawhchu India ramin thlawhna zawng zawng thlawh a tih tawp lai a ni si a. North east tan a man to mahse kan ti mai tur a ni, tiin CM chuan Delhi lama RC te bungraw phur thlawhna zawng tura chahin, Airbus 320, cheng nuai 40 chuang a hire tur hmuh a ni a. Chief Minister chuan Home Ministry lam be bawkin, Mizoramin a mamawh em avangin ngaihtuah sak ngei turin a zuk ngen a. A tawpah Civil Aviation Ministry nen a inbia in Air India hnuaia mi, Cargo Airbus 319 chu cheng nuai 16.23 a phur turin tihfel a ni ta a. Chu thawlhna chu nimin zirtawpni (27.3.2020) khan Lengpuiah a lo thleng a ni. PPE leh mamawh dangte chu avaiin Kg 1797 a rit niin, tihian India hmarchhakah hetianga thlawhna chah hmasa ber kan ni.

Sawrkar laipuiin Mizoram chu a ngai pawimawh em em a. Nimin zirtawpni chawhnu khan Union Home Minister Pu Amit Shah pawhin Mizoram dinhmun rawn zawtin Chief Minister a bia a. India sawrkar aia Lockdown kalpui a nih hmasak tawh thu te, Lengpui airport pawh khar a nih dan te a sawi a. Mizoramin mamawh a neih reng reng chu sawi turin leh sawrkar laipui chuan theihtawpin tan a lakpui tur thu Union Minister chuan a sawi a ni.

Nimina heng bungrua lo thleng te hi mi 10,000 bawr lai thuam theihna niin mamawh dan ang zelin doctor te, nurse te leh damdawi mite hman theih tura ruahman a ni.

3. Supply lama hmalakna:
He hrileng hi fimkhur a pawimawh em avangin mipui punkhawm leh pawnchhuah chungchangah pawh inkhuahkhirhna a khauh hle a. Tunah rih chuan inthlahdul hi a tha rihlo a ni tiin Chief Minister pawhin a bik takin AMC area ah chuan curfew la kenkawh leh bazar chhuah rihloh chu a duh dan a ni.

Heng avanga mipuiin ei leh in lama harsatna an tawh loh na turin ruahmanna siam a ni bawk. BPL leh AAY te tan thla khat chhung chu a thlawna buhfai an dawn theih na tur ruahmanna siam niin, heng zinga tello chhungkaw harsa zual la awmte tan pawh Local Task force te kaltlangin a thlawn a buhfai an dawn dan tur ruahman a ni.

Nitin mamawh (Essential Commodities) mipuiin an nghei loh nan sawrkarin hma a la nasa hle a. Phai atanga chawk luh bakah, Mizoram hmun hrang hrang atanga thlai thar te phur khawm a Aizawl a zawrh a nih theih nan Chief Minister sawi bawhzuia Supply Committee din chuan ruahmanna a siam a. Nizan mai khan khaw hrang hrang atanga thlai thar lakkhawm chu Horticulture Department, Commerce & Industries Department leh Mizofed te buaipuiin collection centre ah dah a ni a. Thawktuten tlaivar puiin an fakawm hle a ni.

Chakkhai hralh leh lei kawngah pawh mumal taka ruahmanna siam zel a ni a. Harsatna awm thei tur thlir rengin, mi pawna an bazar a an chhuah huk theihna tur hawng lova, Chief Minister in a hrilh angin dawr lian whole sale a petute hnen atanga lak theih hun chu vengtin Local Task Force ten a darkar a insem in, mipui hnena hralhchhuah leh dawn pawhin chhung tin ten rualkhai taka inchuhbuai awm lova an lei theuh theih nan, in number a thliar in emaw, felfai taka veng tina hralhchhuah hun siam tura hriattir an ni a. Bazar theih hun siam tura lo tih tawh pawh mipui thil ngaihtuahthiam chin in a him loh dan tur te rawn sawiin, chumi hnu ah zanah CM hovin ngaihtuah that leh niin, hlih leh a ni ta bawk.

4. CM Relief Fund leh Lawmthu sawina: CM Relief fund ah mi tam takin sum an rawn chhunglut zel a. Kohhran, pawl leh mimal ang te in ram chhung leh ram pawn atang tein state in Coronavirus laka him tura hma a laknaah mi harsa leh mamawhte tana phal taka an chhungkhawm hi a lawmawm hle a . A petute pawh a remchan angin puanchhuah zel an ni.

 District leh Local/Village Level a Task Force te an thawk hah in an fakawm hle a. Tun kan dinhmun ah Health lama thawktute an inpekna a ropui hle a. Anni bakah hian duty avanga loh theihloha chhuah ngaite, sawrkar hnathawk leh sawrkar hnathawk nilo pawh, an chungah sawrkar chuan lawmthu a sawi tak meuh a. Mipui an tanrualna leh sawrkar thupek ngaichanga thuawih taka an awm avangin lawmthu a sawi bawk a ni.