Dr.Naveen Aggarwal chuan Electors Verification Programme chu ECI in a duan thar Electoral Roll hrisel, felfai leh dik tak siam theihna tura hmalakna pawimawh tak a ni, a ti a. EVP hmang hian khua leh tui vote nei tawh phawt chuan ECI pawmpui document kengin Electoral Roll-a an chuanna enin, a dik lek dik loh an finfiah thei a, ECI lam endikna leh mimal inendikna a ni thei ve ve a ni, a ti a. Vote nei thar tur, siam that ngai leh paih ngaite thlenga thlen theihna ani tiin, Rualbanlo/ Vohbikte tan Toll Free Number-1950 kaltlangin harsatna thlen theih anih thu a sawi a. DEO chuan EVP hmangin Polling Station leh Voter-te an chenna thlenga Geo Tag tih tum a nih thu sawiin, Voter-te chu EVP hmang tangkai thei tura Common Service Centre (CSC), National Voters’ Service Portal (NVSP), Voter Helpline Mobile Apps leh ERO office te hmelhriata pan turin a chah a. BLO ten EVP kaltlanga endikna nei hman lote an hrut nawn leh vek dawn thu sawiin, Polling Station tinte pawh dan in zawm tura a tih angte an zawm leh zawm loh mai bakah report thar lam ber thlalak nena finfiahna awm ECI lama an thawn dawn thu a a sawi a. Champhai District chu International leh Interstate Border anih avangin BLO ten Polling Station venhim ngai bik leh ngaipawimawh zual ngai bikte an lo thlithlai ve reng angaih dawn thu a sawi bawk. Dr Naveen Aggarwal chuan Media mite chu EVP leh Election kaihhnawih thil a tul leh pawimawh angte mipuite zirtir kawngah leh Electoral Roll felfai leh hrisel siam theihna tura theihtawp chhuah puiah a sawm a ni.
Election Officer, Pu Lalnunfela Chawngthu chuan EVP hun chhung chu September Ni 1 atanga October Ni 15 thlenga hawn anih thu leh hemi hun chhunga Voter zawng zawngte ECI in a pawm document te kenga Common Service Center hnai ber emaw, Mobile Apps leh NVSP emaw ERO Office-a EVP ti theuh turin a sawm a. Special Summary Revision of Electoral Rolls, 2020 -ah Khawzawl District huam tel anih dawn thu leh tun dinhmunah District chhungah ECI-a in register lai Common Service Centre 19 an awm mek thu a sawi bawk.
Champhai District Chanchinbumite chuan Special Summary Revision of Electoral Rolls, 2020 kalpuina kawngah District Election Office tawiawma, District-in Electoral Roll hrisel leh felfai tak aneih theihna tura mipuite zirtir kawngah thuneitute tawiawm tlat an tum thu an sawi a. Zawhna leh chhanna hunte hman a ni bawk.
Tun tum Special Summary Revision of Electoral Rolls-2020 atan hian January Ni 1, 2020 chu qualifying date niin, January Ni 1, 2002 chu qualifying age a ni a, roll a lut thar turte leh la awm lo te bakah paih leh siamthat ngai dangte buaipui a ni ang. Ruahman dan chuan Electoral Roll Draft Copy hi October Ni 15, 2019 hian tihchhuah tum a ni a, hemi ni atanga November Ni 30, 2019 thlengin thuthlen duh neite tan hun hawn a ni ang a. BLO ten an bial theuhah Special Campaign November Ni 2,3,9 leh 10, 2019 ah te an nei ang a. December Ni 15, 2019 ah thuthlen awm angte thlitfim niin, hemi hnu hian ECI pawmpuina dil ani anga, December Ni 31, 2019 ah Database siamthar leh Supplements chhutchhuah a ni ang a, hemi hnu hian Electoral Roll siam thar chu nakum January Ni 1 leh 15 inkarah tlangzarh tum a ni.
Attachment
- Loading attachment...
