Vawiin khan Lawngtlai Additional District Election Officer (Addl DEO) Pu B. Lalchhawntluanga, MCS chuan a pisaah Mizoram Journalists' Association (MJA) Lawngtlai District member-te kawmin, Electors Verification Programme (EVP) chungchang a hrilhfiah.

Pu B. Lalchhawntluanga chuan EVP chu electoral roll dik, felfai leh rin tlak tak a awm theih nana Election Commission of India (ECI) ruahmanna a nih thu sawiin, mipuiin tangkai taka an hman a, a hlawhtlin ngei theih nan chanchinbu mite thawhpuina a ngen a. MJA lam hi an President Pu ZD Dengngura'n hovin, electoral roll felfai zawk nei tura thil tul leh hma lak ngaihna lai hrang hrangte sawi ho nghal a ni.

EVP hi September ni 1, 2019 atanga kalpui tur niin, September thla chhung a awh dawn a. Hemi hun chhung hian vote neite'n National Voter's Service Portal (NVSP) atang te, voter helpline atang te leh Common Service Centre leh Booth Level Officer (BLO) te kal tlangin an hming, kum, address leh an chanchin kimchang dang electoral roll-a a lan dan an enfiah thei ang a. Tin, BLO-te'n an huam chhunga voter-te endikin, vote nei rual electoral roll-a la chuang lote zawn chhuah hna an thawk bawk ang a. Chumia siam rem ngai leh belh ngai leh paih ngai apiang chu tih nghal zel tur a ni dawn a. Hemi hun chhung hian inthlan huna harsatna a awm loh nana polling station then emaw, section-a then emaw chungchangah pawh hma lak a ni bawk ang.

EVP hi electoral roll dik tawk lo siam that leh vote nei rual roll-a chuang si lo ziah luh a nih theih nan te, chhungkaw khata mite'n hmun khata vote an thlak theih nana an vote neihna hmun siam rem nan te, voter ID card-a thlalak fiahfai tha tak a awm theih nan leh electoral roll felfai zawk a awm theih nana ruahman a ni.