Vawiin khan Mizoram sawrkar  programme New Economic Development Policy (NEDP) bultumin Mizoram Entrepreneurship Development Monitoring Committee (MEDMOC), Indian Institute of Management Calcutta Innovation Park (IIMCP) leh Mizoram Consultancy Group (MzCG) tangkawp buatsaihin Govt. Champhai College Multipurpose Hall-ah Entrepreneurship chungchang zirchianna Awareness Programme neih a ni.

Programme hi Pu Liansangzuala Chhakchhuak, Addl DC Champhai chuan a kaihruai a. Mizoram sawrkar hmalakna NEDP hnuaia Entrepreneurship awareness programme  Champhai hmun ngeia neih a ni chu lawmawm a tih thu a sawi a. Mahni irawm chhuak thiam thil nei, bul tanna leh tan dan tur hriat loh avanga a tak ram thleng thei mailote puihna tura inhrilhhriatna hun neih a ni tur chu thil pawimawh tak anih  thu a sawi a. Nikum lamah pawh Business Plan Contest hlawhtling taka neih a lo nih tawh  thu pawh a sawi a. Hemi puala lokal Sawrkar department aiawh, helama tuimite leh zirlaite chu uluk taka zirtirnate ngaihthlaa, hlawkpui tum theuh turin duhsakna a hlan a ni.

He hunah hian Resoures Person atangtein zirtirna benglut tak tak ngaihthlak a ni a. Dr Samuel Vanlalthlanga, Master Trainer-in Entrepreneurship awmzia leh kalphungte sawi zauna a nei a. Entrepreneurship chu thalai leh zirlaite tinzawn deuh bik anih thu a sawi a. Heng bakah hian Entrepreneurship Development Scheme (EDS) nihphung leh hmalaknate a tarlang bawk a ni. Pi Lalrinngheti Sangsiama, Managing Partner, Mizoram Consultancy Group-in Mizoram Kailawn, Plan B-Contest sawifiahna a nei a, a dil dan hmangte entirin a sawifiah nghal bawk a ni. Pu Zoramchhana, Entrepreneur, Mizoram Kailawn B-Plan Contest-2017 a tel hnen atangin a tawnhriatte ngaihthlakna neih  a ni a. Zirtirna hun hman zawh hnu hian zawhna leh chhanna hun neih a ni a, kalkawmten hriat duh an neihte zawtin hun hlawkthlak tak hmanho a ni.

EDS kaltlang  hian Master Trainer Batch khatna mi 10 te chu nikum khan National Institute for Micro, Small and Medium Enterprises (NIMSME) Hyderabad-ah leh IIM, Calcutta-ah te training neih tir a ni a. A batch hnihna pawhin NIMSME atangin tun hnai lawk khan training an rawn zo ve leh tawh bawk a ni. Master trainer-te kaltlang hian Entrepreneurship lama tuimite zirtirna leh an hriat duhte zawhfiah theih a ni a. Champhai District atangin tun hnai khan Pi Laldinfeli SDC leh Pu Lalthanpuia, Associate Professor, GCC-te chuan NIMSME, Hyderabad-ah training an zuk nei a ni.

Mizoram Kailawn B-Plan Contest-2018 a tel duhte tan April Ni 3 atang khan an website www.mizoramkailawn.org kaltlangin online application May ni 10 thlengin a tih theih a, diltu chuan kum 18 a tling tur a ni. Ruahman dan chuan May Ni 30 hian First round result puan tur a ni ang a. June Ni 13 atanga 16 chhung hian Second round atan Booth Camp neih a ni leh ang a. June Ni 18 atanga 19 hian Final neih pui tur  niin, June Ni 21 hian Entrepreneurship Summit neih a ni dawn a ni. 

Mizoram sawrkar chuan Entrepreneurship lama hmasawnna hmangin thalaite tan eizawnna kawng thar leh tha zawk a thlen thei a ni tih hriain New Economic Development Policy (NEDP) hnuaiah Mizoram State Entrepreneurship Development Monitoring Committee (MEDMOC) chu October Ni 25, 2016 khan a din a. MEDMOC chuan Entrepreneurship lama tui thalaite tan kawng  hawn sak a tum bakah an bul tanna tur thlengin a ngaihtuahsak dawn a ni. 

MEDMOC hnuaiah hian Entrepreneurship Development Scheme (EDS) kalpui niin Chief Secretary kaihhruaina hnuaiah Planning & Programme Implementation Department, Commerce & Industries Department leh Higher &Technical Department hotute an tel a, Non-official expert member 3 an tel bawk a ni.

MEDMOC thawhpui IIM Calcutta Innovation Park (IIMCIP) hi India rama Management zirna IIM-Calcutta hnuaia awm a ni a. India ram hmun hrang hranga entrepreneurship hmasawnna atana hmalatu ber niin India hmarchhakah pawh nasa takin hma a la mek a, Mizoram University leh tualchhung entrepreneur-te nen kum 3 kalta atang khan hma an lo la ho tawh a ni. 

Mizoram Kailawn hi Planning Minister Pu Lalsawta chuan Nikum July ni 18, 2017 khan I&PR Auditorium Aizawlah a hawng a ni.