Vawiin chawhma khan Mizoram University(MZU) zirlaite, zirtirtute, office hnathawkte leh pawnlam mi sawmbik ten MZU din champha vawi 18-na chu MZU Auditorium-ah an lawm a. He hun hi Finance Minister Pu Lalsawta chuan khuallian niin a hmanpui a ni. 

Finance Minister Pu Lalsawta chuan Mizoram in University chhuanawm tak, India ram chhungah pawh zahpuiawmlo tak, tehna hrang hranga mark hmu sang tak a nei chu a vanneihthlak tih a sawi a. MZU in kum 18 chhung leka a thlenchin leh a hlawhtlinpui tam takte  thil ropui tak, zirlaite leh Mizoram tana hlawkna tam tak a ni a ti. Finance Minister chuan MZU in mithiam chherchhuah piah lamah a hnuaia thawkte kaltlangin Mizoram hmasawnna tura thluak leh tha thawh kawngah  hnuhma a ngah tawh hle a. Kawng tam takah sawrkar thawhpuiin Mizoram Flagship programme New Economic Development Policy(NEDP) ah phei chuan a kul a taia hnathawktu leh thluak thawhtu an nih avangin sawrkar pawh MZU chungah a lawm em em a ni a ti.

Zirlaite fuihna thu sawiin Mizoram in hmasawnna tura hmundangte aia remchan zawkna pathum a nei tih a sawi a. "Mizoram aia sik leh sa nuam zawk khawvel hmundangah a awm lo. Mizoram chhunga mi te zawng zawng tawng pakhatin kan inbepawp vek thei. Tin, ziak leh chhiar thiam state kan ni.  Heng remchanna te in hriat a, kan hun neih zah leh ramchangkang zawka mite hun neih rei dan a in ang tih in chian phawt chuan mahni hlawhtlina atan bakah ram tana hmasawnna nasa tak thlentu te in ni ang. Tui zawng in neih te kha vuan tlat ula, in tuina zawng thiamna kha peipun tumin hlawhtlinna sualchhuah in tum dawn nia. Mahni tuina zawngah chuan a tawp thlen ngam tur, mihring tu pawhin  dam thlen chen a nei tho tho a ni", a ti. 

Foundation Day puala thuchah sawiin MZU Vice Chancellor Prof K.R.S Sambasiva Rao chuan MZU in tun hun a thlen theihna tura an tha leh theihna lo thawhtu zawng zawngte chungah lawmthu a sawi a. Prof K.R.S Sambasiva Rao  chuan zirlaite mithiam a chher turin MZU Research lamah theihtawp a chhuah dawn bakah Mizoram mipuite hmasawnna turin a theihna zawnah nasa zualin tan a la chhunzawm dawn a.  Socio - Economic Development programme hrang hrangah phur takin sawrkar a thawhpui zel dawn a ni a ti. MZU hlawhtlin langsarzualte leh hmachhawp hrang hrang te a tarlang a; chung zingah chuan MZU Campus chhunga Football Ground siam tur pawh a tel a ni. 

MZU hi kum 2001 April ni 25 khan din a ni a; hemi kum vek, July ni 2 atangin ataka hna thawk tanin zirna pawh a kalpui tan a ni. Tunah hian MZU hnuaiah constituent college pakhat - Pachhunga University College leh Affiliated College 31 a awm mek a. Kum 2014 khan National Assessment and Accreditation Council(NAAC) chuan zirna in tha zual zingah MZU hi tehtlingin NAAC Grade 'A' a pe a; National Institutional Framework chuan ramchhunga zirna intha zual a thlan zingah MZU chu a thaber 94-na pe in University zingah phei chuan a thaber 58-naah a dah a, Mizoram Pollution Control Board in Green Audit a neih pawh khan MZU chu hmunhma thianghlim leh enkawl uluk zingah chhiarin Grade 'A' a lo pe tawh bawk a ni. 

MZU Foundation pual hian online kaltlanga hna kaihhnawih thiamna zirte mamawh information pawimawh pekchhuahna hmun, Massive Open Online Courses(MOOC )Centre - Online learners Facilitation centre chu Finance Minister Pu Lalsawta chuan MZU Cluster building-ah a hawng a. MOOC kaltlang hnuaiah hian online in Business & Management, Marketing & Communication, Employability Skill & Life Skills, Computer Science: (Programming, Softwares, etc), Arts & Performing Arts, Architecture, Civil Engineering & Designs,  Biology & Life Sciences, Chemistry, Computer Science : (AI,Robotics & Vision), Economics & Finance, Entrepreneurship & Professional Development leh thiamna dang hna zawnna atana tang kai tak tak te a zir theih a. http://www.mzuict.in/program ah a en a en theih a ni.

MZU Foundation  Day puala programme a hman zawh hian Finance Minister Pu Lalsawta chuan  MZU Campus-ah tho hian indian Institute of Mass Communication (IIMC) a tlawh leh a. Hetah hian zirlaite nen inkawmna hun an hmang a, sawrkar hmalakna hrang hrangah Media pawimawhna leh Media mite mawhphurhna te an sawiho a ni.

Attachment

  • Loading attachment...