2656/2022-2023
Champhai, the 14th November, 2022: Special Summary Revision of Electoral Roll, 2023 inpuahchahna kalpui mek zelah vawiin chawhnu dar 1 khan Champhai DC Conference Hall-ah Electoral Registration Officers (EROS) leh Asst. Electoral Registration Officers (AEROS) te tan training buatsaih a ni.

He hun hi District Election Officer Pu James Lalrinchhana, District Bawrhsap ni bawk chuan kaihruaiin Special Summary Revision of Electoral Roll, 2023 chungchanga hriattur leh pawimawh dangte a sawi a. Master Trainer Pi Esther Leihang, SDC & AERO Champhai South AC chuan kalkhawmte form thar hman tur chungchangah zirtirna a pe a ni.

Draft Electoral Roll 2023, November ni 9, 2022 a tlangzarh takin a tarlan danin Champhai District chhunga Assembly Constituency 3 huamchhunga Polling Station 84 ah vote nei mi 55,301 (mipa 27,036 leh hmeichhia 28,265) an awm a, mipa vote nei aiin hmeichhe vote nei 1,229 in an tam zawk a ni. Assembly Constituency zingah 24-Champhai South A/C ah vote nei mi 20,289 (mipa 9,746 leh hmeichhia 10,543) awmin an tam ber a, 23-Champhai North A/C in dawtin vote nei mi 19,531 (mipa 9,498 leh hmeichhia 10,033) awmin an dawt a, 25-E.Tuipui A/C-ah voter 15,481 (mipa 7,792 leh hmeichhia 7,689) awmin vote nei awm tlemna ber a ni.

Special Summary Revision of Photo Electoral Roll, 2023 ah hian qualifying date chu January ni 1, 2023 a ni a, hemi ni a kum 18 tling hman tur India khua leh tui (citizen) dik takte tan Electoral Roll-a inthun dil theih a ni a, hemi rual hian siam that ngai siam, paih ngai paih leh insawn duhte siam fel theihna hun pawh hawn a ni a. Ruahman dan chuan Special Summary Revision of Photo Electoral Roll 2023 kaltlang hian November ni 9, 2022 atanga December ni 8, 2022 chhungin Claims and Objection - Electoral Roll-a inthun, paih, insawn leh siam that, dilna thehluh theih hun chhung hawn a ni a, hemi hun chhung vek hian a remchan dan angin hearing neih chhoh zel a ni ang. December ni 26, 2022 thlengin dilna leh rawtna thlente chinfel a ni ang a, database siamthat leh supplement chhutchhuahte tihfel a nih hnuah January ni 15, 2023 hian Electoral Roll thar ber tlangzarh tum a ni.