No.1078/2020-2020

Thil man sang zel tur ven kawnga hmalak dan tur Champhai Bawrhsap Pu Mark Lalthanliana hova thukhawmin a lo rel tawh bawhzuiin, vawiin khan Legal Metrology Enforcement Staff, Champhai District, Champhai Police leh VLTF-te tangkawp chuan Essential Commodities, nitin mamawh chi hrang hrang dawrkaite thil zawrh chu hrilhlawk lovin an endik a, MRP pela thil zuar mi 3 an man a, MRP (Maximum Retail Price) pela to taka hralhte chu Legal Metrology Act 2009 leh Package Commodities Rules (2001) hmangin hrem theih an ni a, an chungah hian dan angin hmalak tum a ni.

Sumdawngte chu an thil zawrhte mipui tana to uchuak lo a hralh tur leh DC Order dinglai ani tih hria a, dan bawhchhia chu hrem theih a nih thu an hriattir nghal zel a. Nitin mipui mamawh chi hrang hrang; Alu, Dal, Tel, Buhfai, Purunsen, Purunvar, Chini te chu buk a tling em tih an endik bawk a. Sumdawngte chu mipui tana harsatna siam lo tur leh an duh zat zat thil man (rate) siam lo turin an hriattir nghal bawk a ni.

Heng bakah hian Cement rate endikin, a buk a tlin leh tlin loh an enfiah nghal a. Cement hi dealer leh mimalin mahni hman tur an chah thin a, MRP pela zuar leh hralh lo turin an hriattir nghal zel a. Cement chah thlengte chu an hralh chhuah hma ngeiin Legal Metrology-ah hriattir zel thin turin an hrilh a. Mipuite Cement pawlhdal laka fimkhur turin an chah a ni.

Endikna hunah hian Pu Lalnundanga, Inspector, Legal Metrology, Pu Joseph Lalhnehzela, SI, Pu C.Zohmingliana, ASI bakah Legal Metrology Staff, Police leh vengchhung VLTF te an tel a ni.

Bungrua reng reng MRP pela zuar leh MRP inbel lo a zuar an awm anih chuan Legal Metrology Department Phone number- 7005670443/8257872311 ah te hrilhhriat zel tur a ni ang.