No.1077/2020-2020

Aizawl Bawrhsap hmalaknain vawiin khan Aizawl khawpui dai vela leivung paihna hmun hrang hrangte chu Addl. DC, Aizawl Pi K. Vanlalruati kaihhruaiin thuneituten a hmunah kalin a huhova enfiahna (joint verification) neih a ni.

Aizawl khawpui chhehvela leivung paihna hmun pakua enfiah a ni a. Mission Vengthlang atanga Tlawng Lui pan thlakna kawngpui kam, Maubawk ramchhunga awm, AMC-in leivung paihna hmun atana mimal hnenah phalna a lo pekah te chuan bawlhhlawh leh leivung paih a tam lutuk tawh avangin a hmunhmain a dawl zo tawh lo va; nasa takin Aizawl khawpui tuitlan ber Serlui leh Tlawng Luite a tibawlhhlawh a. Chumi nghawng kal zelah chuan tunhnaiah PHE Department-in tum engemawzat tui an pump hlei thei ta lo nghe nghe a ni.

Chumi a nih avang chuan Tlawng Lui panna kawngpui kama leivung paih phalna permit a lo pek zawng zawngte pawh AMC-in a titawp nghal a. Henglai hmunah hian leivung lam chi engmah paih phal a ni tawh lo va. Dan bawhchhiaa paih lui an awm a nih chuan The Mizoram Municipalities Act 2007 (Section 157-A) hmangin leh Aizawl Bawrhsapin Section 144 of the CrPC anga khapna thupek a tihchhuah hmangin dan angin na taka hrem an ni dawn a ni.

Tlawng Lui panna kawngkamah hian leivung bakah, a rukin mihring ek leh ran thite pawh paih thin a ni tih enfiahtute hian an hmu a. He thil phei hi chuan nasa takin khawpui a cheng mipuite hriselna a khawih pawi theih avangin enfiahtute chuan an la thutak hle a. Hetiang tih chingte hi man an nih chuan hremna an pumpelh lohna tura hmalak nghal nise an ti a ni.

Dan lova leivung leh bawlhhlawh dang paihtute veng turin Nursery Veng ramriah leh Lawipu Veng kawnah Local Council hruaitute nen tangrualin ralveng (duty) dah nise an ti bawk.

World Bank Road lamah AMC atanga phalna neia leivung paihna hmunte pawh uluk taka enfiah a ni a. Hengte pawh hian kar lovah Chite Lui a tihbawlhhlawh thei tawh dawn nia an hriat avangin, thil pawi a thlen hmain ngunthluk zawka ngaihtuah that leh nise an ti bawk a. World Bank Road kawngkama leivung paihna thenkhat, Chite Lui tibawlhhlawh theite chu AMC thupekin khar tir an lo ni tawh a, enfiahtute chuan heng hmunah te hian phalna pek tawh loh nise an ti a ni.

Aizawl khawpui dai hmun remchangah leivung paihna tur hmun remchang dang zawn nise tiin enfiahtute hian rawtna an siam bawk a, hei hi a rang thei ang bera bawhzui nghal nise an ti a ni.

Vawiina enfiahnaah hian AMC aiawhte, Aizawl SP aiawhte, PHE Department aiawhte, UD & PA Department aiawhte, Disaster Management & Rehabilitation Department aiawhte, Information & Public Relations Department aiawhte, Mizoram Pollution Control Board aiawhte, Aizawl District Disaster Management Authority aiawhte, Save Chite Lui Coordination Committee aiawhte, Aizawl City Local Council Association aiawhte leh Maubawk Local Council aiawhte an tel a ni.