No.1076/2020-2020

Covid-19 hripui leng vanga tampui a thlen lohna tur leh ei leh bar tharchhuah kawnga chak zawka hmalaka intodelh anih theihna tura district hrang hrangte fangkuala hmala mektu, Agriculture Development Board Team pahnihna Pu H.Biakzaua, MLA, Vice Chairman, Agriculture Development Board kaihhruai chuan vawiin khan Champhai tlawhin, DC Conference Hall-ah Sawrkar official, VC, NGO, AMFU leh Chanchinbumite meeting an neih pui a ni.

Pu H.Biakzaua, MLA, Vice Chairman, Agriculture Development Board, Govt. of Mizoram chuan hripuiin enge a thlen dawn tih a hriat lova, tunhma lama hripui lengte tampuiin a zui thina, tampui thleng mai thei pumpelh anih theihna tura tam zawka buh leh bal tharchhuah theih dan turte dap tura lokal an nih thu sawiin, kalkhawmte chu sawihona leh inrawnkhawmna zau tak nei turin a sawm a. Agriculture Development Board member-te chu Team pathuma inthenin Mizoram district hrang hrangte an tlawhkual mek thu a sawi a, Agriculture Minister Pu C.Lalrinsanga hovin Kolasib leh Mamit district lam fan anih thute, Team khat dang Pu Lalropuia Pachuau hovin chhim lam tlangdung an fan mek thu leh Saitual, Khawzawl, Champhai leh Serchhip district-te a kaihhruai team-in an tlawh mek zel thu a sawi a. Covid-19 hripui leng mek avangin khawvel pumpui, India leh Mizoram thlenga kan buai mek thu tarlangin, tunah rih chuan eitur nei mah ila, nakin lawkah harsatna a lo la thleng thei a, chumi tur chuan kan inralrina inpuahchahlawk a ngai ani, a ti a. Mizoram buhfai mamawh zat chu kum tin metric ton nuai khat leh singriat anih laiin tualchhung tharchuah zat erawh chu metric ton sing ruk chauh a ni a, hei hi kan mamawh atanga hmun thuma thena hmun khat chauh anih avangin buhfai tam zawk chu State pawn atanga lakluh thin ani, a ti.

Agriculture Development Board Vice Chairman chuan hripui leng vangin India ram ei leh bar tharchhuahna hmunpui Leileta hnathawktute mahni khaw lam pana an haw tak zel avangin hnathawk tur an tlem tial tiala, tharchhuah kawngah nasa takin nghawng a nei ngei dawn a, hei vang hian tualchhungah theihtawp kan chhuah angai ani tih hriain Loneitute hamthatna leh hmalak dan turte enfiaha lokal kan ni, a ti a. Thlai chi kan la intodelh rih loh thu pawh sawiin, tunhnaiah State pawn lam atangin thlai chi cheng nuai sawmsarih chuang man lei anih tawh thu leh hmun danga innghat mai lova tun atanga mahni mamawh khawp intodelh tura ngaihtuahna kan sen tan angaih thu a sawi a. SEDP kaltlangin Vaimim leh Pulses chi te ngaihtuah anih thu sawiin, Vaimim hmun Acre 1400 atan Vaimim chi quintal 174 chin tur pekchhuah anih thu leh indaihlohna vanga a dang quintal 200 chah belh leh anih thu sawiin, pulses pawh a chin hunah a chite semchhuah leh tum a ni, a ti a. Hmun tam takah kang hreng tura tih niin, hmalak zel a ni a, Vaimim ei chhe thintu Fall Army Worm beihna tur hmanrua engkim inralrin vek tawh niin, harsatna neite in report vata hmalak nghal zel tum a ni, a ti bawk. Loneitute hamthatna dawn theihte hrilhhretu kan nih angai a, hemi kawngah hian chak lehzuala hmala turin department lama thawktute chu a chah a. Champhai chu leilet zau tak nei, theihna sang tak awmna Mizoramah pum huapa entawntlak ni tura beisei a ni, a ti a. Buh thar theihna hmun tizima thil danga siam danglam chu sawrkarin tha a tih loh thu sawiin, Loneitute chu Agriculture land/buh tharna hmunte veng him hram hram turin a ngen a. Hripui thleng thinte tampuiin a zui thin tih sawi thin chu a taka a thlen lohna turin ngawi mai mai lova kan hmaa tihtur awmte rinawm leh taima taka kan hlenchhuah angai a ni, a ti bawk.

He hun hi Pu Mark Lalthanliana, Deputy Commissioner Champhai chuan kaihruaiin, Vice Chairman Agriculture Development Board leh Team Member ten ei leh bar intodelh anih theihna tur kawng dapa Champhai an rawn tlawh leh inrawnkhawmna hun an rawn nei chu lawmawm a tih thu a sawi a. Hun hlu tak senga kalkhawmte chungah lawmthu a sawi bawk.

Pu George Lalthanngura, DAO Champhai chuan Vaimim chi vairiety hrang hrang quintal 30 chah chhuah hmasak bakah chah belh quintal 20, avaiin quintal 50 chu Cluster 18 ah te semchhuah anih tawh thu sawiin, Chana (Field Pea) pawh a chin hunah pekchhuah leh tum anih thu a sawi a. Vaimim chi bakah thlai chi dangte Rs 60,000-70,000/- man hu dapkhawma semchhuah tawh ani tiin, chul rih tum in report pawh chhungkaw 1500 chuang an awm tawh a ni, a ti a. Champhai phai zawl chu dah awl mai lova nasa lehzuala chhawr tangkai a tul thu sawiin, mipuite chu hmun rem lai apiangah thlai chi tuh turin a chah a ni.

Thusawitu dang Team Member, Commissioner Lalkiamlova chuan Mizote chuan tunhma pawhin ram dang atanga puihna tih tham dawng lova tampui tam tak kan lo hmachhawn tawh thin thu a sawi a. State pawn atanga buhfai lakluh awlsam tak avanga kan innghat lutuk thin chu thalo a tih thu sawiin, Leilet leh buh thar theihna hmun dangte mahni ngeiin tangkai taka kan enkawl angai tawh ani, a ti a. Lo neih theihna zawng zawnga Lo neih kan infuih thar leh a pawimawh thu sawiin, mipuite chu intodelh tuma sawrkar pur kher lova mahni kutke a ding thei tura tanla sauh sauh turin a fuih a. Mahni intodelh leh eikhawp thar thei tura khawtinte kan tanrual angaih thu a sawi bawk.

Meeting-ah hian tampui pumpelh turin buh leh bal tharchhuah theihna hmunhma neih ang angte tangkai taka hman a tul thu tarlan anih bakah, Sawrkar laipui siam Loneitute hamthatna dawn theih Scheme hrang hrang, Pradhan Mantri Kisan Samman Nidhi (PM-KISAN), Pradhan Mantri Kisan Maan-Dhan Yojana (PM-KMY) leh a dangte Media kaltlanga zau zawka inzirtirna neiha puanchhuah nise tih a ni bawk.

Tukin khan Pu H.Biakzaua, MLA, Vice Chairman, Agriculture Development Board hian DAO Office, Vengsang, Cold Storage New Champhai leh Champhai Leilet te Team member-te leh Agriculture department Officer-te nen tlawhin an enfiah a ni. Team Member dang MLA rawn tawiawm tute chu, Pu BC Lalbiakngura, Commissioner Lalkiamlova, Pu Lalruatfela Colney leh Pu Zion Lalremruata te an ni. Vawiin vek khan Serchhip district panin Champhai district an chhuahsan a ni.