Kumin Lok Sabha inthlanna neih tura inpuahchahna kalzelah EVM khawlte endik hna chu vawiin atang khan Champhai DC Conference Hall-ah neih tan a ni a. Ni hnih awh tur EVM khawlte endik hna hmasa ber ‘First Level Checking (FLC) of EVM’ hi District Election Officer (DEO) charge la mektu Pu Liansangzuala Chhakchhuak hova neih a ni.

Ni hnih chhung awh tur EVM khawlte endik hna hmang hian nikum General MLA Election-a vote thlakna atana hman Ballot Unit (BU) 225,  Control Unit (CU) 235,  leh VVPAT 225 te bakah SVEEP hnuaia training nana hman Ballot Unit, Control Unit leh VVPAT 11 theuhte chu ECIL Engineer-te kaihhruaina hnuaia endik a ni a, vote thlak nana hman tawhte uluk taka thenfai a nih mai bakah EVM khawltinte hi inthlan leh huna hman theih turin siam rem leh nghal vek a ni a, Political party aiawh a tel ten vote thlak chhinna Mock Poll an nei nghal zel bawk a ni.

EVM khawl Control Unit, Ballot Unit leh VVPAT-te hi ECIL Company siam niin, Company lam atanga lokal Engineer rual ten an endik a. Vawiin EVM Strong Room hawnga EVM lachhuaka, khawlte endikna hunah hian Pu Liansangzuala Chhakchhuak DEO Champhai, Pu Abraham Beirazi Khithie, Election Officer Champhai, District Election Official, Political Party aiawh leh Security Personel-te an  tel a ni.