Assam Education Minister hmasaber Omio Kumar Das hming chawia  kum 1989 a College din  OKD Institute of Social Change and Development, Guwahati leh  Govt.J. Buana College, Lunglei te tangkawp a buatsaih ni thum chhung awh tur National Level Workshop on Capacity Building  chu  nimin khan Tourist Lodge Zotlang Lunglei ah hawn a ni.

He hun hi Govt. J. Buana College Principal Prof. J. Zoreman a kaihruai a, OKDISC atangin Dr. Joydeep Baruah chuan workshop neih chhan sawifiahin mithiam leh zirna kawnga hma la mek Research beitu ten khawvel inthlakthleng chho mekah Research thazawk leh awmze nei zawk an beih theih nana workshop chu huaihawt a nih thu a sawi a ni.

He workshop hi vawiin atang in Govt. J Buana College Seminar Hall ah neih chhunzawm a ni ang a, mithiam thlanbik ten Research mumal leh tha zawk hriat dan te, huap zauzawk research beih dan tur zirtirna an pe  ang. He workshop ah hian MZU bakah College hrang hranga mi thiamte an tel a, Citizenship Amemdment Bill 2016 chung changte pawh  sawi hona an nei  bawk ang.