Mit dartlalang thawh tura inzirtirna Eye Donation Forthnight Vawi 33-na chu vawiin khan Govt. Champhai College Multipurpose Hall-ah neih a ni a. Eye Donation Fortnight hian August Ni 25 atanga September Ni 8, 2018 thleng a awh dawn a ni.

He hun hi Pi Vanlalnghaki, CMO Champhai chuan kaihruaiin khawvel mawina hmu ve theilo te’n khawvel mawina an hmuh ve theihna tura mit darthlalang thawh chu midang tana malsawmna a ni, a ti a. Khawvel mitdel panga zinga pakhat chu India rama mi a nih thu sawiin, Mit hrisel nei tur chuan nikhatah darkar 7 tal mut angai a, mit tihfai leh a khat tawka Doctor  entir thin a pawimawh thu a sawi bawk a ni.

He huanh hian Dr R.Lianmawia, District Programme Manager, National Programme for Control of Blindness & Visual Impairment (NPCB&VI) chuan India ramah Eye Donation Forthnigh chu kum 1985 a India ram Prime Minister hlui Rajiv Gandhi-an a mit a thawh atanga hman tan a ni, a ti a. Mizoram bikah chuan July Ni 31, 2008 khan Aizawl Civil Hospital-a Eye Bank atanga bul tan a ni a, a vawikhatnan kum 2009 khan Civil Hospital leh Sri Shankaradeva Nethralaya Hospital, Guwahati-te tangdunin mit darthlalang thlakna an neih thu a sawi a. Tun dinhmunah Mizoramah Mit thawh tura inziaklut 5356 an awm mek thu leh dawng tur inziaklut 313 awmin, Mit thawh tawh 345 leh mit thalo thlak sak 86 vel an awm tawh thu a sawi a. Mit thawh chu a uiawm lova, tu tan pawh a tih theih ani tiin, thawh duhte tan CMO Office emaw, DMS Office-ah emaw inhriattir a Donation Pledge lak chhuah reng theih a ni a ti bawk.

Pi Lalrinchhani Khiangte, Principal, Govt. Champhai College pawhin thu sawiin College Zirlaite chu midang tana malsawmna nih tuma mit thawhtu nih  tum turin a chah a. Health & Family Welfare Department buatsaiha College chhunga Eye Donation Forthnight vawi 33-na neih ani chu lawmawm a tih thu a sawi bawk a ni.

Vawiin hian Champhai District atanga thih hnua mit thawhtu mi 5; Henry Lalmuanpuia, Champhai Kanan; Vanlalruata, Vaphai; Lalrinkimi, Vanchengpui; Rothangpuii, Champhai Zion Veng leh JC Vanlalvuana, Farkawn  chhungte hnenah chawimawina thuziak Dr. Zatluanga, District Medical Superitendent, Champhai chuan a hlan a.  Eye Donation Pledge College Zirlaite hnenah semna neih a ni a. Pu K.Lalramhluna, Opthalmic Assistant, District Hospital Champhaiin lawmthu sawina neiin hun a khar a ni.

Mitdarthlalang (Cornea) hi mit pawnlang bera har fim tak mit hmalam tuamtu hi a ni a. Tihpalh emaw taksa mamawh ei loh avangin a paw thei a chu chuan mitdelna a lo thlen thin a ni. Mitdarthlalang petu an awm chuan a thlak theih a ni. Mit darthlalang chu thih atanga darkar 6-8 chhunga lak chhuaha, a mamawhtu hnenah enfiah anih hnuah darkar 96 chhunga vuah sak leh tur a  ni. Mit donate duh tan Mit pek phalna form/ Eye Donation Pledge lakchhuah a, Eye Bank-ah thawn tur a ni a, Eye Donor Card an lo pe chhuak dawn  a ni.