Vawiin chawhnu khan Khuangchera Hall Ailawng-ah Bialtu MLA Pu Lalrobiaka, ZIDCO Chairman kaihhruaina in  Ailawng Branch YMA leh Mizoram Public Works Department( MPWD) te chuan Community Base Road Maintenance Contract Works atan thawhhona thuthlung an ziak a. Hemi hnu hian bialtu MLA chuan MLAD Fund Rs 2,00,000/- senga sak, YMA In chu a hawng nghal bawk a ni.

MPWD nena thawhhona thuthlung an ziah ang chuan Ailawng Branch YMA te hian an khaw kawng, khawdang te pawn an zawh tawm Kilometre 12 a thui enkawl hna  chu kumin September thla atang hian kum khat chhung atan an thawk dawn a ni.
 
MPWD leh Ailawng YMA te thawhonna thu ziahna hunah hian ZIDCO Chairman Pu Lalrobiaka, bialtu MLA chuan vawiina programme buatsaih chu  kawng enkawl chungchangah hmasawnna thar a ni a. Kawng enkawlnaah a khawtual mite an tel thei tur hi thil lawmawm tak, a kawngzawhtu te tan thleng pawha neitu riltu pe theitu tura hmalakna, ram changkang zawkah pawh hlawhtling taka an kalpui mek a ni a ti a. He hmalakna thar hi sawiseltu ni lova, a hlawhtlin nan theihtawp chhuahtu nih kan tum tlan a ngai zawk a ni a ti.  Kawng hi hmasawnna bulthut leh a intanna nih avangin a pawimawh a, a humhalh hnathawh pawh hi hna pawimawh bik; mi tinte thawhhona tur a ni a tih a sawi a. "Sawrkar ta hi mipui ta a ni a, sawrkar chu mipuite siam a ni a, sawrkar thil leh bungrua hi keini mipuite ta hi a ni a; a nihna ang taka duat enkawl turin kan in ngen nawn leh a ni", a ti.

Pu David Sapzova, Sr.EE, PWD, Road South chuan kawngpuite hi mipuite ta neih se tih duhna leh sawrkar thahnem ngaihna atang rawn irh chhuak a nih thu a sawi a. Kum khat atan inremna hi a nih hmasak tur leh chu chu zirchian a nih leh phawt tur a ngai a ni.

MPWD aiawhin  Pu David Sapzova, Sr.EE, PWD, Road South leh Ailawng khawtlang aiawhin Pu Zoramthanga, President, Ailawng Branch YMA ten thawhhona thuthlung Community Base Road Maintenance Contract Works hi an ziak a ni. He inremna ang chuan Ailawng Branch YMA te hian Tlawng Lei atanga Ailawng khaw hmawr, Reiek khua te nena an inrina na lai, Lunghmul Lui inkar kawngpui, KM 12 a thui hi, kumkhat atan, a enkawl na atan  KM 1 a thui zelah Rs 40,000/- zel dawngin an vil  dawn a. Ailawng Branch YMA hnathawh tur kawngpui thawm that hian, kawngkhuar hnawh rual, tuihawk luankawr thenfai, kawngsir tawn tawna hnawmhnawh thenfai leh kawngpui dung humhalh te thlengin a huam dawn a ni.