2242/2022-2023

Champhai, the 8th October, 2022: Bawlhhlawh paih hmaa thliar hran (Waste Segregation at Source) tih thupui hmanga Faina Hapta vawi 46-na, Mizoram Cleanliness Week 2022, October ni 1 atanga ni 8 chhunga hman kharna hun chu Swachh Bharat Mission (Urban), Urban Development & Poverty Alleviation Department buatsaihin tukin dar 7 khan Kahrawt Field, Champhaiah District Bawrhsap, Pu James Lalrinchhana hova hman a ni.

District Bawrhsap Pu James Lalrinchhana chuan faina chu rilru leh thinlung atanga tan a ngai tih sawiin, hapta chhung mai nilo kumtluana kalpui tur leh nunphunga sengluh ngai a ni, a ti a. Faina hapta hman dan tura duante tha taka hlen a ni chu lawmawm tiin, hapta chhunga thahnemngai taka tha thawhtu zawng zawngte fakawm a tih thu a sawi a. Taksa, in leh avel leh khawlai atanga faina belhchian dawl hmanga bul kan tan chuan hrileng tam tak kan pumpelh thei dawn a, kan lo hriselin hma kan sawn thei dawn a ni, a ti. Faina kawngah tun aia nasa zawka tanlak tlan a tul thu sawiin, Champhai khawpui kianga lui luang Keilungliah khuah chuan kan khawpui fai leh fai loh mai bakah kan dinhmun chiang takin a la tarlang dawn a ni, a ti bawk.

Bawrhsap chuan fai tih chen leh faina ngaihpawimawh dan a inan loh thu sawiin, district mipuite chu faina kawngah lungawi tawkna tehkhawng sang tak siam tur leh chumi chhawmnung thei tura theihtawp chhuah zel turin a chah a. Faina kawnga hmalakna kalpui zel a nih dawn thu sawiin, remchan dan ang zelin road protection squad leh town sanitation task force-te chet chhuah tum a ni a, mipuite tawiawmna kan ngen a ni, a ti a. Tawih thei leh thei lo thliar hran chu a taka kalpui tum a nih thu leh hemi kawnga mipuite ngaihtuahna seng tura chahin, bawlhhlawh paih mai mai tura ngaih atangin thil hlu leh tangkai, sum chang theite thlengin kan siam chhuak thei a ni, a ti a.  District mipuite chu hman khat daih polythene leh plastic-te hmang tlem deuh deuh tur leh tirem tura tan la turin a chah a. Faina beihpui thlak chu mizo tlawmngaihna nena kalkawp tlat tura a duh thu sawiin, district mipuite chu thangtharte tana chenna tlak environment nuam hnutchhiah tura tan la turin a sawm nghal bawk a ni. 

He hunah hian bawlhhlawh thliar hran kawnga hmalakna kalpui tha vengte hnenah lawmman sem a ni a. Tlangsam chu pakhatna niin pawisafai Rs 5,000 an dawng a, an ni hian kumin July ni 1 atang khan bawlhhlawh an thliar hrang tan a, a tam ber chu mahni ina kalpui home composting niin, khawtlangin compost pit lian tak an nei bawk. VC in kar khatah vawi khat tawih thei an khawn thin a ni. Pahnihna dinhmun hauhtu Chhungte chuan pawisafai Rs 4,000 an dawng a, an ni hian hnawm paihna khur compost pit siam zo tawhin home composting an kalpui a, VC huamchhung in tinah bawlhhlawh thliar hranna tur bawm pahnih twin bin hun vek a ni. Pathumna lawmman dawngtu Ruantlang chuan pawisafai Rs 3,000 an dawng a, Hawilo Self Help Group ten bawlhhlawh tawih theite sawngbawlin leitha an siam thin a, sum tam tak an thawkchhuak tawh a ni. An hmalakna ngaipawimawhin VC ten leitha siamna in an siam sak bawk. Heng bakah hian mimal bawlhhlawh tawih thei leh thei lo thliar hran kawnga entawntlak taka hmalatu Pu Vanlalthafamkima, Champhai Vengthlang hnenah lawmman pawisafai Rs 3,000 hlan a ni bawk.

Faina hapta kharna hun hi Dr. Lallawmkima, DIPRO Champhai chuan a kaihruai a. Hapta  hman dan leh hemi chhunga hmalak dan tlangpuite Pi R.Lalnunkimi, DUDO Champhai hnen atangin ngaihthlak a ni a. Bawlhhlawh thliar hran kawnga hmalakna endik tura ruatte aiawhin Pu Lalhlupuia, Vice President, MJA Champhai District-in report kimchang leh result puanna hun a hmang a. Pu K. Zamlova, Chairman, Joint VC Champhai South-in lawmthu sawiin hun a khar a ni.

He tih rual hian Champhaiah faina kawnga Veng, Office, Zirna in, Restaurant, Hotel leh Hospital-te inelna chu kalpui chhoh mek zel niin, November thla chhoah endikna hnuhnung leh lawmman semna neih tum a ni.