2243/2022-2023

Lunglei the 8^th October' 2022 : Tukin khan Convention Hall, Lunglei ah Faina Hapta  2022 kharna leh India ram a khawpui fai inelna Indian Swachhata  League & Swachh Survekshan 2022 Awards lawmna hun hman a ni. Dr. K. Pachhunga, Lunglei South bialtu MLA leh Vice Chairman, Mizoram Bamboo Development  Board chu khuallian niin Pu Kulothungan A, IAS, Deputy Commissioner leh Lunglei District Level Sanitation Task Force Committee ni bawk chuan khualzahawm niin an hmanpui. Kumin faina hapta 2022 thupui chu Bawlhlawh paih hma a thliar hran a ni.

He hun hi Pu M. Michael, Project Director, District Rural Development Office, Lunglei in kaihhruaiin kalkhawmte lawmna thusawina neiin faina ngaipawimawha he hun hmang tura lokal te a lo lawm a, Faina chungchanga khawpui fai inelna Indian Swachhata League & Swachh Survekshan a Lunglei District in India sawrkar atanga lawmman alak theihna chu faina kawnga mipui, sawrkar, kohhran, NGOs te hmalakna leh thawhrimna vang a ni a ti.

Khuallian Dr. K. Pachhunga chuan thusawiin Lunglei District in India ram khawpui faina inelna  ah lawmman pahnih Indian Swachhata League leh Swachh Survekshan 2022 lawmman lak a vangin Lunglei mipuite chungah lawmthu a sawi a, heng lawmman lak theihna chhan chu DC, VC hrang hrang, DUDO, Clean Lunglei te hmalakna leh mipui ten faina leh thianghlimna kawnga theihtawp an chhuah vang a ni a ti. Lunglei District hian faina kawngah hlawhtlinna tam tak kan nei a, khawpui mi chauh nilovin thingtlang ah pawh faina hi hmuhtheihin a awm thu a sawi.  Khua leh tui tha ni tura pawimawh ber chu faina leh thianghlimna hi a ni tiin mihring changkang tur chuan faina hi ngaihpawimawh a tul thu a sawi a, faina lama hma kan sawn theih nan keimahni thinlunga bul tan a ngai a, hei hian hriselna leh damreina a ken tel thu a sawi bawk. Faina hapta hi hapta chhung chauh nilovin kumtluana fai turin a chah a, kan nitin nunah faina hi chhungkua tin ah zirtirna nei zel ang u a ti a ni.  Dr.K. Pachhunga chuan Lunglei District hmasawnna thenkhat  tarlangin zirna, hriselna leh sports lamah hmasawnna tam tak hmuhtur  a awm thu a sawi a, MPSC combined exam ah Lunglei lam mi pali in hlawhtlinna an chan thu sawiin a lawmpui thu a sawi bawk. Hriselna lamah Lunglei Civil Hospital ah mipui zawng zawng mamawh Oxygen Plant tha tak bun a ni a, Laboratory changtlung tak neih thuai anih tur thu leh CSR Fund hmanga  Hospital  thuam a nih thu a sawi bawk. India ram state hrang hrang mipui rethei leh rethei lo dinhmun zir chiangtu te tarlan danin North East state zingah Mizoram leh sikkim te chauh hi dinhmun tha ber a awm thei kan nih hian kan sorkar mipui tan a a that zia a tarlang a ni, a ti .

Khualzahawm Pu Kulothungan A pawh in thusawiin Lunglei District mipui ten  faina thinlung kan put avangin India ram khawpui fai inelna ah lawmman pahnih Indian Swachhata League leh Swachh Survekshan 2022 India sawrkar atang dawn thu sawiin nikuma best city, best innovation award leh best citizen in citizen feed back award aiin kumin a lawmman lak hi a san thu a sawi a. Kum lo kal zel tur ah heng aia sang lawmman la thei tura inpuahchah turin Lunglei District mipuite a sawm ani. Bawlhlawh paih hma a thliar hran kawngah hmalak a ngaih thu sawiin chhungkaw tin te, office leh zirna in ah te hmalak hmasak  theih nise  tiin Solid Waste Management Centre ataka kalpui theih hunah  bawlhlawh thliar hran kawngah tha taka zawm theuh turin Lunglei mipuite a chah bawk a ni.

Pi Vanthangpuii, DUDO, UD&PA Department, Lunglei in report pein Faina Hapta 2022 chu 1^st October, 2022 ah hawnna neih a ni a, thupui atan Bawlhlawh paih hmaa thliar hran (Waste Segregation of Source) niin hemi ni hian Lunglei khawpui chhungah VC leh YMA  ten hnatlangpui  an nei a, faina hapta chhung hian bawlhlawh paih hmaa thliar chungchangah door to door awareness campaign office, zirna in , college, bazar ah te neih a ni a. VC ten aurinna hmangin mahni veng chhungah bawlhlawh thiar hran dan puanzarna neih a ni a, Media ten faina kawngah an chanchinbu leh TV kaltalangin  puanzarna an nei bawk. Self Help Group te pualin Lunglei Luangmual ah PHE Department  bawlhlawh sawngbawlna hmun ah hun hman a ni bawk. India ram khawpui fai inelna mihring cheng 50,000-1,00,000 tehna  Indian Swachhata League (Faina Rally) leh Swachh Survekshan (Clean City in North East Zone) 2022 ah lawmman lak anih thu a sawi bawk.

Faina Hapta chhunga bawlhlawh paih hmaa thliar hran kawng a hma la tha Pi Lalnuntluangi, Lunglawn  leh Zohnuai VC te hnenah lawmman pek an ni.

Pu C. Lalhmingmuana, Chief Organiser, Clean Lunglei in lawmthu sawina a nei bawk.