2041/2022-2023
Champhai, the 23th September, 2022: Vawiin chawhnu dar 1 khan District Level Cleanliness Week Celebration Committee (DLCWCC), Champhai District chu an Chairman Pu James Lalrinchhana, District Bawrhsap hovin Faina Hapta- 2022, October ni 1 atanga ni 8 chhunga hman dan tur chungchang relin I&PR Conference Hall-ah an thukhawm.

Bawrhsap Pu James Lalrinchhana chuan faina hapta hman turah tanrual a ngaih thu leh district-in tun aia nasa zawka faina kawnga hma a sawn theihna tur tinzawna hmalak a tul thu a sawi a. Faina hapta hnuaia hmalakna piah lamah Champhai Town Sanitation Task Force ruahmanaa faina kawnga hmalakna kalpui chhoh mek zel a nih thu a sawi a. Champhai District nuam, fai leh thianghlim siam kawngah mitinte thawhhopuiah a sawm nghal bawk a ni.

District Level Cleanliness Week Celebration Committee Member Secretary Pi R. Lalnunkimi, DUDO Champhai hnen atangin faina hapta chhunga hmalakna tur duante ngaihthlak a ni a. Faina hapta chu khawpui fai inelna 2022 atana pawimawh tak a nih thu sawiin, Mizoram chhunga khawpui 28 ahte faina hapta hman a ni dawn a, hmalakna hrang hrangte tha taka thlawpa social media campaign-te thahnemngai taka tawiawm turin mipuite a sawm nghal a ni.

Thutkhawmah hian Mizorama faina hapta hman dan tur duan mila Champhaia hmalak dan turte ngaihtuahho niin, faina hapta hawnna chu October ni 1, 2022 zing dar 7 ah CHANEM building-ah District Bawrhsap Pu James Lalrinchhana hova neih ni se tih a ni a. Kharna hun chu October ni 8, 2022 zing dar 7 ah Kahrawt Field-ah District Bawrhsap hova neih ni se tih a ni a, programme kimchang duan nghal a ni.

Faina hapta neih chhungin faina kawnga hmalaknate media hrang hrangte hmanga puanzar leh inzirtirna tam thei ang ber neih nise tih a ni a. October ni 5 ah mimal leh pawl anga bawlhhlawh sawngbawlna kalpuite District Level Committee member ten tlawha enfiah ni se tih a ni a. Digital flyer leh video clip tawite siama thehdarh ni se tih a ni bawk a. Bawlhhlawh thliar hran kawnga hma la tha vengte hnenah lawmman pek ni se tih a ni a, endik turte ruatfel an ni a. Heng bakah hian mawhphurhna hrang hrangte siam niin an mawhphurhnate tha taka hlen theuh tura ngen an ni bawk.

Ruahman dan chuan October ni 1, 2022 hian Faina Hapta - Cleanliness Week hawnna leh bawlhhlawh thliar hran kawnga inzirtirna 'Segregation of Waste At Source (SWAS) hawnna neih nghal a ni dawn a. Hemi ni hian VC area veng zawng zawngah Faina Hnatlangpui (Mass Cleanliness Drive) neih tum a ni a. October ni 3 hian in, dawr leh pisa tinahte kalin bawlhhlawh thliarhranna campaign, brochure/leaflet/poster-te sem tum a ni a. October ni 4 hian School, College, Bazar, Biakin leh Sawrkar Pisa-ahte bawlhhlawh thliar hran dan inzirtirna kalpui tum a ni a, Two-Bin system hman dan chipchiar taka entir tum a ni.

October ni 5 hian mimal leh pawl anga bawlhhlawh sawngbawlna hmun hrang hrangte tlawh tum a ni a. October ni 6 ah veng tinah aurinna hmangin bawlhhlawh thliarhran inzirtirna puan tum a ni a. October ni 7 ah hmun lun lai leh mipui tamna hmunahte bawlhhlawh thliarhran inzirtir nan bawlhhlawh bawm (Twin-bin) hun tum a ni a, October ni 8 ah faina hapta khar a ni ang.

Attachment

  • Loading attachment...