2040/2022-2023
Mamit 23rd September, 2022 : Vawiin khan I&PR Conference Hall, Mamit-ah Mamit District Level Children's Science Congress-2022 neih a ni a. Pu Emmanuel, Addl. District Project Coordinator, Samagra Shiksha Mamit chuan khuallian niin a hmanpui.

Pu Emmanuel chuan zirlaite chu thahnemngai taka an zirlaite zir tur leh thiamna tak tak nei tura tumruhna nena hmalam pan zel turin a chah.

He hunah hian Mamit District chhunga School hrang hrang atangin Junior Category-ah school pali (4) leh Senior Category-ah School paruk (6) te inelin, Junior category-ah hian Gov't Middle School - II Mamit te chu pakhatna an ni a. Senior category-ah St. Francis of Assisi High School, Mamit-te chu pakhatna an ni bawk. District Level Children's Science Congress-2022 a school tel zawng zawngte hi lawmman pawisa fai leh certificate pek vek an ni a. Pakhatna lawmman latute hian State Level Children's Science Congress- 2022 Aizawla neih turah Mamit District tan an inlan dawn a ni.

Mamit District Children's Science Congress-2022 hi Pu Zoliansanga Tlau, Academic Coordinator, District Level Children's Science Congress chuan kaihruaiin, Pu Andrew Lalthlanawma, District Coordinator chuan keynote address a pe a. Dr. Lalhmingliani Hnamte, Head of Department (Chemistry) Zirtiri Residential Science College, Pi Ramthanpari, Lecturer DIET Mamit leh Pi Thanghmingliani, Lecturer, Govt Mamit Higher Secondary School-te chu Science Teacher Association Mizoram (STAM) atangin Judge an ni.

He hunah hian Mamit khawpui chhung atangin zirlai leh zirtirtu mi 80 chuang an tel a ni.