No.2354/2021-2022

Aizawl the 27th September, 2021: Vawiin khan District Level Cleanliness Week Celebration Committee (DLCWCC), Champhai District chu an Chairman Pi Maria C.T Zuali, District Bawrhsap hovin 'Faina-Kan in leh a chhehvel atangin' tih thupui hmanga Faina Hapta-2021, October ni 2-8 chhunga hman dan tur chungchang relin DC Conference Hall-ah an thukhawm.

Bawrhsap Pi Maria C.T Zuali chuan fai tura tanlak kawngah tanrual a tul thu sawiin, fai turin sum sen teuh a ngai lova, sawrkar pur kher lo pawhin mahni theuhah faina nun a sengluh theih avangin nunphunga kan hman phawt chuan kan fai kumtluan thei dawn a ni, a ti a. Faina chu mimal leh chhungkua atanga tan phawt a tul thu leh khawtlang leh a velahte kalpui chhoh zel tur a nih thu sawiin, Champhai District nuam, fai leh thianghlim siam kawngah mitinte thawhhopuiah a sawm nghal bawk a ni.

Thutkhawmah hian Mizoram Cleanliness Week Action Plan duan mila faina hapta hman dan turte ngaihtuahho a ni a. DLCWCC meeting chuan faina hapta hawnna chu October ni 2, 2021 hian CHANEM Building-ah neih ni se a ti a, programme kimchang chu UD&PA Department kutah dah a ni. October ni 4 atanga ni 7 chhungin District Headquarters leh urban town leh khaw hrang hrangah faina lam hawi hnathlang leh hmalaknate neih nise tih a ni a. October ni 8, 2021 hian hapta kharna hun DHO Pisa tual, New Champhaiah neih ni se tih a ni bawk.

Faina hapta neih chhungin fai endikna kalpui tha tih a ni a. Sawrkar Pisa leh Sikul fai endik turin MJA Champhai District, Veng fai endik turin Sub-Hqrs. YMA, Restaurant, Hotel, Hospital leh Bazaar fai endik turin Sub-Hqrs. MHIP te ruat an ni a. Social media leh Print media kaltlanga inzirtirna pekchhuah nise tih a ni bawk a. Faina kawnga hmalakna leh inzirtirna kalpui tha nitin chhuak Chanchinbu lawmman siam leh faina thupui thlan hmanga Mass Photography Competition buatsaih tha tih a ni a, lawmmante hi faina hapta khar ni October ni 8, 2021 ah semchhuah a ni ang.