No.2353/2021-2022

Aizawl the 27th September, 2021: District Election Office, Champhai buatsaihin Electoral Roll Special Summary Revision 2021 inpuahchahna atana Booth Level Officer (BLO) training chu vawiin khan I&PR Auditorium, Champhaiah neih tan a ni. Vawiin training-ah hian Application thar hman tur Garuda App leh Votter Helpline App hman dante leh tul dang BLO te zirtir an ni.

Traning hawnnaah thusawiin Pu Lalnunfela Chawngthu, Election Officer, Champhai chuan Roll-a lut thei diktakte chauh an luh theihna turin BLO te chu uluk tak leh fimkhur taka hnathawk turin a chah a. E-Roll-a lut thar turte chu Kum 2004, January thla leh a hma lama piangte an nih thu sawiin November thla chhungin dilna theh luh tur tih ni mah se, AERO te'n November ni 15 atangin hearing programme an tihfel tan dawn avangin November ni 15 hma
lama application thehlut turte chu tihfel vek tura beisei an nih thu sawi a ni.

Pu Lalnunfela Chawngthu chuan E-Roll-a luh dil emaw paih emaw siam that leh insawn turte emaw te'n an mamawh leh a hun an hriat theihna turin veng chhung tlangau leh Social Media lamah a zau thei ang bera puang zar turin BLO te chu a ngen bawk.

Vawiin training-ah hian Pi Esther Leihang, AERO-in Garuda App leh Votter Helpline App hman dante BLO te a zirtir a ni. Pi Kawlhmingliani, DEO leh Pu J.Lalthanmawia, DEO, Election Branch, Champhaite pawhin zirtirna an pe bawk.

He hunah hian SVEEP Experience, Comments leh Suggestion Sharing Competition BLO te tana buatsaih lawmman sem niin Pu Lalhmachhuana, Selam chu pakhatna niin Pu RL Hmingthanzaua, Chhungte chu pahnihna a ni a, Pu Billy K.Lalnuntluanga, Bulfekzawl chu pahthumna a ni a; Pu Zamtinkhupa, Vapar leh Pu H. Zairemmawia, Bethel-1 te Consolation Prize pek an ni bawk.

Vawiin hian Champhai khawpui chhung leh hnaivaia BLO te tan training buatsaih phawt a ni a. Hnahlan, Khawbung leh Champhai khawpui chhung veng thenkhatte training hi pek an ni dawn bawk a ni.