No.2352/2021-2022

Aizawl, the 27th September 2021 : Vawiin khan Tourism Department enkawltu Minister Pu Robert Romawia Royte chuan Tourism Department in World Tourism Day 2021 puala programme Vanapa Hall ah an buatsaih chu khuallian niin a hmanpui a. Vawiina programme ah hian Sawrkar Laipui, Ministry of Human Resources Development ina 2015 atanga an lo kalpui, India a cheng hnam hrang hrang leh state hrang hrang inkara in unauna leh inlaichinna tha siam nana programme an duan - Ek Bharat Shreshta Bharat programme pawh hman a ni bawk a. Minister hian Thenzawl Golf Resort portal (website) pawh mipui hman theih atan a tlangzarh nghal a ni.

Pu Robert Romawia Royte chuan Covid hripui avangin mimal, chhungkua, pawl leh Kohhran ten harsatna kan tawk nasa a, Sawrkar tan pawh a buaithlak hle a, ngai kan awh hun tur a hriat lova, khawvel pumah hripui avanga tuar nasa chu tourism leh a behchhan industry te chu an ni a, Mizoram ngei pawh tourism sector behchhana eizawngte an mangangin an tuar hle tiin a sawi a. A enkawl Department pahnih Tourism leh Sports & Youth Services te chu a tuar nasa an nichungin heng Department pahnih ruhrel, hall leh facilities tam takte chu covid veite enkawlna hmun atana Mizoram pumah hman tangkai a ni a, chuvangin harsatna karah chhanchhuanna hna thawkin an thawhhlawk hle a, hei hian amah leh Department a thawkte rilru a tih nawm thu a sawi.

Tourism hmasawnna chungchang sawiin Minister chuan Tourism lamah hma kan sawn theih nan Sawrkar a pawimawh ang bawkin private players te an pawimawh a, hei hi kan hriat nawn fo a tha a, inpeizawn chunga kan kal chuan nasa takin tourism thanna tur a thleng thei dawn a ni, a ti a. Tourism hmasawnna hi kan vai atan anih angin theihtawpa inchawi kang tawn zel tur kan nih thu a sawi bawk a ni.

Minister chuan Allocation of Business Rules 2019 siam tharin Hotels, Restaurant, Homestay etc., te Tourism hmalakna hnuaiah dah niin Rules leh Guidelines te siamin nasa taka hma lak chhoh zel anih thu a sawi. Convention Centre, Chite ah changtlung tak neih tumin hmalak mek anih thu leh PRASAD hnuaiah Project 4 velah hmalak tum mek niin approval pawh hmuh tawh anih thu a sawi bawk. Heng bakah hian Multi Utility Centre te, Cultural leh Heritage Village te neih tuma theihtawp chhuah mek zel ani a ti a. Heritage Tourism lamah nasa taka hma lain heng piah lamah hian Zo Kutpui buatsaihin ramdanga Zofate nen insuihkhawmna kawngah theihtawp a chhuah mek zel thu te a sawilang bawk a. Mipui hman theih turin Thenzawl Golf Resort website a tlangzarh bawk a ni.

Khualzahawm Pu TC Pachhuanga, Ex-MLA, Vice Chairman, Tourism Board pawhin thusawina hun neiin Standard Operating Procedures for Tourist Lodges/ Hotels te hman tur tlangzarhna hun a hmang bawk.

Hun kaihruaitu Pi K. Lalrinzuali, IAS, Secretary, Tourism Department chuan kalkhawmte lawmna thusawiin, vawiin hian World Tourism Day mai bakah hun pawimawh tak Ek Bharat Shreshtha Bharat kan hmang tel thei hi lawmawm a tih thu sawiin, he programme hi India rama chengte kan inpawh leh zualna atana Sawrkar laipuiin a buatsaih anih thu a sawi bawk. Tourism Sector chu Covid 19 Pandemic tuar nasa ber pakhat an nih thu leh hrilêng reh hun atana nasa leh zuala hmasawn thei tura Department pawh an inbuatsaih thu sawiin tourist hip lut tur chuan theih tawpa kan hmun hmate uluk taka enkawl hi mitin mawhphurhna a ni a, kan tan ho that a pawimawhin, a hlawkna pawh mitinin kan tel theih tura theihtawp chhuah a tul thu a sawi bawk.

Kumina World Tourism Day thupui ‘Tourism for Inclusive Growth’ sawizauna chu Dr. R. Lalrinchhani, Deputy Diretor chuan neiin Covid hripuiin khawvel pumah tourism industry a nghawng dan te a sawi a ni.

He hunah hian Ek Bharat Shreshtha Bharat hman nghal niin, hemi chungchanga presentation Pi C. Ramsangzuali, Tourist Officer hnen atangin ngaihthlak ani a. Ek Bharat Shreshtha Bharat atana Sawrkar laipuiin partner states atana a ruat Bihar leh Tripura te hnen atangin Cultural Performance hmuhnawm tak thlir ho a ni.

Tourism Department buatsaih 2nd Batch Tour Guide exam pass chhuak mi 6 te hnenah Pu V Lalengmawia, Director, Tourism Department kaihhruaiin Certificate leh Licence hlanna hun hman a ni. World Tourism Day 2021 denchhena buatsaih Videography leh Sound Track competition lawmman sem niin, Director leh Joint Director Pu Saitluanga te kaihhruaina hnuaiah lawmman hlanna hun hi hman a ni. Lalrinhlui, Tourist Officer kaihhruaiin kalkhawmte chuan Responsible Tourism Pledge sawi rualna neih anih bakah Pu Isaac Zothanpuia, Project Manager, MSEGS hnen atangin Technical Report on Thenzawl Golf Resort Website hi ngaihthlak a ni bawk.

Pi Lalthakimi Pachuau, Deputy Director, Tourism Department chuan lawmthu sawina hun hmangin World Tourism Day 2021 Programme chu khar a ni.