Ni 9.10.2018 khan Mizoram hmun dang rualin Faina Hapta 2018 chu Champhaiah pawh a kharna hun I&PR Auditorium, CHANEM Building-ah  hman a ni. He hunah hian Pu K.Vanlalthiana, Addl DC Champhai chu khuallian niin Faina Hapta hi a khar a ni.

Pu K. Vanlalthiana chuan faina chuan rilru, taksa, thinlung, chenna leh chhehvel vawnfai a huam ani, a ti a. Fai rawngbawlna chuan bawlhhlawh tlansan niloin, fai tura thinlung pe a senso huama fai duhna neia hmalak chu a kawh ber a nih thu a sawi a. Kan taksa leh  chhehvel tihfai hi mitintena kan mawhphurhna a ni tiin, faiin tlai luat leh hun bik a nei lo a, kum tluana fai tum chu faina nun nei tura pawimawh tak a ni, a ti a. Incheina leh khawsak changkang reng si tui thianghlim in tur neilo leh inthiarna hmun hma tawp lutuk neite chu thil inhmehlo tak anih thu sawiin, neck tie awrh chunga bawlhhlawh chhar ngamte chu mi ngaihsanawm tak an ni, a ti a. Faina hapta kharna huna kalkhawmte chu faina leh thianghlimna nunpui chhunzawm zel turin a chah nghal a ni. 

Faina hapta puala intihsiakna hrang hrang lawmman sem nghal niin Veng fai intihsiaknaah Hmunhmeltha chu pakhatna a ni a, Pahnihna Tlangsam niin Venglai pathumna a ni bawk. Champhai District Court chu Office fai berah thlan a ni a, EE Office, PHED chu pahnihna niin SDEO chu pathumna a ni bawk. High School leh Higher Secondary School-ah Pine Hill H/S chu fai berah thlan a ni a, Govt R. Hranga High School chu pahnihna niin, PES Zotlang chu pathumna a ni bawk. Middle School-ah Govt. Vengthlang Middle School chu fai berah thlan a ni a, PES Vengthlang pahnihna niin Govt Bethel MS chu pathumna a ni bawk. Primary school-ah Govt Champhai Primary School VI (Bethel) pakhatna a ni a, Govt Tlangsam Primary School II pahnihna niin Govt Champhai PS IV (Kanan) pathumna a ni bawk. Anganwadi-ah Venglai II leh Zotlang IV pakhatna an ni a, Zotlang II pahnihnain Bethel III pathumna a ni bawk. Restaurant-ah Sawmtei Restaurant Venglai pakhatna a ni a, HC Gilgal Restaurant Venglai pahnihna niin OK Restaurant Venglai pathumna a ni bawk.

Faina Hapta puala Middle School On the Spot Painting Competition-ah Lalrinnungi BC Lalthlamuana English Academy chu pakhatna a ni a, Zochhuansanga PES Vengthlang pahnihnain Lalhriatrenga Govt Zotlang Middle school chu pathumna a ni. High School & Higher Secondary School on the Spot Essay Writting Competition-ah John Vanlalremruata, Govt Champhai High School pakhatna a ni a, C Lalrinnungi Govt GM High School pahnihnain VL Ngaihzuali Bethel High School chu pathumna a ni bawk.

Faina Hapta kharna hun hi Pu K.Lalhmuakliana, DUDO Champhai chuan a kaihruai a, Pu C.Lalengkima, SDS, UD&PA-in report pein fai inelna neih dan a sawifiah nghal a ni.