Vawiin khan Agriculture Technology Mission (ATMA) Champhai District Agriculture & Allied department leh KVK Khawzawlte bultumin Loneitute leh Scientist-te inrawnkhawmna ‘Farmer Scientist Interaction Programme’ chu I&PR Auditorium, CHANEM Building, Champhaiah neih a ni. He programme hi ATMA hnuaia Scheme ‘Support to State Extension Programme for Extension Reforms ‘ tih hnuaia buatsaih niin, Loneitute harsatna sutkianna tur leh zawh duh an neihte zawhna hun atana buatsaih thin a ni. He hun hi Champhai DC Dr Naveen Aggarwal, IAS chuan khuallian niin a hmanpui a ni.

Khuallian chuan Sawrkar laipuiin kum 2022 a Loneitute sum lakluh zat a leta tih pun a tum tihhlawhtlinna tur atana, abik taka Loneitute leh mithiamte inkawmhona hun siam ani thei chu lawmawm a tiin, an zinga hun a hmang thei chu chhuanawm a tih thu a sawi a. Programme buatsaihtu Agriculture leh a kaihnawih Department leh KVK-te chungah lawmthu a sawi a. Loneitu kalkhawmte chu  mithiam zawkte atanga an thil zir leh hmuhte chu midangte hnena hrilh chhawng ve zel thin turin a chah a. Loneitute sum lakluh zat tipung tur chuan buh leh bal leh thlaite hun hnih ,Double Cropping hmanga chin thin angaih thu a sawi a. Tui harsatna sukiang  turin Lei hnuai atanga tui siakchhuahte, Ni zung leh Electric hmanga pump chhuaha semkual angai a ni, a ti a. Hemi kawngah hian sawrkar pawhin nasa takin tan a lak thu a sawi a. Mizoramah In chhung khura hman tur ruahtui   khawl anih thin ang hian Lo leh thlai huana  hman tur Tui dahkhawlna tha tak siam ni thei se  chuan Tuia harsatna chu a ziaawm phah a rin thu a sawi a. Tui lakna leh dahkhawlna kawnga harsatna awmah DC Office leh Line Department-te chu engtiklai pawha pan hreh lo turin a chah a, a bikin DC Office chu Loneitute tan a inhawn reng thu leh, harsatna leh ngaihdan an neihte thlen thin tura chahin, “A tul angin Line Department-te nena thawk hovin harsatnate chu chinfel tum zel a ni ang”, a ti a. Line Department hotute leh KVK lama thawktute chu Loneitute chawikang kawnga theihtawp chuah zel turin a chah a. Loneitute pawh thiamna tak tak zira an hnathawhna kawnga hmang tangkai ngei thei turin a chah nghal bawk a ni.

Vawiin Farmer Scientist Interaction Programme hawnna hun hi Pu James Vanlalluaia, District Agriculture Officer (DAO) leh Project Director, ATMA Champhai District nibawk chuan a kaihruai a. Dr. M.Chinlampianga, Dy. Project Director, ATMA Champhai District-in programme neih dan tlangpui a sawifiah a. Pi Lucy Lalrinpuii, District Fisheries Development Officer (DFDO) in lawmthu sawina hun hmangin hawnna hun bik hi a khar a ni.

Hun hnihna hi Dr. Vanlalhruaia Hnamte, Sr. Scientist & Head KVK Khawzawl kaihruaina hnuaiah neih zui a ni a. Agriculture leh a kaihhnawih Department hrang hrang hnuaia mithiamte leh KVK lam atanga mithiam ten department hnathawh leh scheme kalpui pawimawh tak takahte zirtirna an pe a. Loneitute’n zawh duh an neihte an zawt nghal zel bawk a ni. Hun hnihna hi Pu B.Lalchhuana, District Sericulture Officer (DSO) Champhai chuan thusawi tawi hmangin a khar a ni. He hunah hian Loneitu 40 vel an tel thei a, Line Department atangin hotute an kal thain Loneitute’n an hlawkpui hle a ni.