Vawiin hian Serchhip DC Committee Room ah Serchhip a Independence Day 2018 hman dan tur, Pi Sangchhin Chinzah, Bawrhsap kaihhruaina hnuaiah neih a ni.

Chairman Pi Sangchhin Chinzah chuan, Independence Day hman dan tur  chu zalenna hlut zia leh zalenna zara kan hmasawnna tam tawh zia rilrua hre reng chunga phur taka rel chi a nih thu a sawi a. Kum tina kan tih thin a nih vanga thil pangai ang leka ngaih atan chuan a uiawm lutuk a ni, a ti.

Vawiina meeting chuan, he ni hmanna hmun atan Khawtetlang Playground a thlanga, zing ni chhuah hlimah sawrkar leh mimal building remchangah te hnam puanzar zar a ni anga, he ni puala thilpek chi hrang hrangte Serchhip leh Chhiahtlanga Hospital leh Home ah te sem a nih hnuah chawhma dar 11:am ah a lawmna pui ber neih tan tur a ni ang. He hunah hian Parade Contingent 15 leh Pipe Band te parade tura ruahmanna siam niin, Assam Rifle atangin Cultural Programme hmuhnawm tak beisei a ni bawk a. Playground a hun hman zawh a nih hnuah DC Bungalow ah At Home Tea Party buatsaih zui a ni bawk ang.

He ni hlawhtling taka hman a nih theih nan hian Department hrang hrangte chu an hna chanpual tur ruat niin, sum leh pai senso tur pawh kum dang aia thahnem deuh zawk Department hrang hrangte hian an thawh dawn a, Independence Day Football Tournament pawh Serchhip District Football Association te kaihhruaina hnuaiah nimin Dt 23.7.2018 atang khan khelh tan a ni tawh bawk.

Vawiina meeting ah hian Addl. DC Pu Chuauhnuna, SP Charge la mek tu Pu Lalsanglura leh Department Officer te, pawl hrang hrang hruaitu leh khawtlang hruaitute an tel tha hle a ni.