Vawiin khan Convention Center, Lungleiah MBSE buatsaihin Lunglei District huap ‘Integrated Evaluation Scheme Software Training for High Schools and Higher Secondary Schools’ neih a ni. Pu Lalthangbika, Secretary, Mizoram Board of School Education (MBSE) chuan training hi a hmanpui.

Training hawnna inkhawm Pu R. Lalthlamuana, Regional Officer MBSE kaihhruaiah Pu Lalthangbika chuan ‘Integrated Evaluation Scheme’ (IES) chu zirna lama hmasawnna hmanraw pawimawh tak a nih thu sawiin he scheme thiltumte hlen chhuak turin rinawm leh fimkhur taka hmang theuh turin zirtirtu kalkawmte chu a chah a. Integrated Evaluation Scheme-ah hian internal assessment atan mark dah niin sikul tinin anmahni sikulah an tehin an endik tur anih avangin Mizoram pumpuiah rualkhai tak leh rintlak taka kan kalpui a tul a ni, a ti a. Training-a an hriatthiam loh te inthlahrung hauh lova zawt chiang tura chahin zirtirtute chu he training-in zirtir a tum zawng zawngte tha taka zir chhuak turin duhsakna a hlan a. Training a an thil zir piah lamah zirna ti hmasawn zel tura hmalak tul an tih te leh an thil vei zawng dangte zalen taka sawiho turin MBSE Secretary chuan zirtirtu kalkhawmte chu a sawm bawk.

Training ah hian Higher Secondary School Lecturers Association of Mizoram (HISSLAM) leh Mizoram Secondary School Teachers' Association (MISSTA) hruaitute bakah Lunglei District huam chhunga high school leh higher secondary school zirtirtu thahnem tak an tel a. Pu David Lallawmkima Fanai, Director, Academic leh Pu Michael Lalrinmawia, AO, Training ten he Integrated Evaluation Scheme Software chungchangah zirtirna an pe a. Zawhna leh chhanna hun hman a ni bawk.

Integrated Evaluation Scheme (IES) hi 2016-17 academic session atang khan High School-a hman tan niin 2017-18 academic session atang khan Higher Secondary School-ah te hman tan a ni a. IES hnuaiah hian exam, assignment leh test bakah attendance, General Studies, Work Experience leh Physical and Health Education ten mark an pu a. Hemi scheme hnuaiah hian Theory section in mark 80 a pu a, Internal Assessment in mark 20 a pu thung a. Practical nei subject ah chuan Theory in mark 70 a pu a, Practical in mark 10 leh Internal Assessment in mark 20 a pu thung a ni.