Vawiin chawhma khan Information & Public Relation Department buatsaih Ni 3 awh tur Workshop on Film Production & Script Writing, I&PR Auditorium ah hawnna hun hman a ni a, Pu Biaktluanga IAS, Commissioner & Secretary Information and Public Relation Department chu khuallian niin he hun hi a hmanpui.

Pu Biaktluanga chuan Film siamtute chu kan ram leh hnam ziarang khawvel hmun hrang hranga phochhuahnan a hmanraw pawimawh tak in ni tih hria in in hnaah hian tih takna leh tumruhna nen kalzel ang che u, a ti a. Pu Biaktluanga chuan Film in a a ken tel zirtirna tha tak awmtur chuan Film siamtuten an suangtuahna leh ngaihtuahna an hman thiam hle a ngai a, an Film siam a zirin mipuite hnenah a tha zawng leh chhe lam zawngin nghawng thui tak a nei thei a ni, a ti a, Workshop on Film production & Script writing hi tangkai taka hmang turin leh hmasawnna an neih theuh theihna turin a duhsakna a hlan bawk.

Pi Lallianpuii MIS, State Nodal Officer, Visual Arts chuan Mizoram pawh Film lamah hma kan sawn mek zela, Film City leh Theatre kan neih theih nan hmalakna a kal mek a ni, a ti a. Electronic media hmangin Film te awlsam takin a siam theih tak avangin Film siamtute hian Moral Responsibility lian tak in chelh a ni, a ti a, mipui rilru sukthlek a tha zawnga kaihruai theitu ni turin Film tha tak tak siam zel turin a chah bawk. Pu Lalawmpuia Khiangte, President Mizoram Film Forum chuan Mizo film te hi kan ram leh hnam min suihkhawmtu a ni, a ti a, kan mizo culture leh tradition phochhuah nan leh humhalh nan a hmanraw pawimawh tak a ni, a ti.

Workshop on Film Production & Script Writing hawnna hun hi Pu David L Thangliana, Director I&PR in a kaihruaia, Pi Irene Lalruatkimi, Associate Prof, MZU leh Pu Lalsawmliana Pachuau, Patron MFF ten Ni 25 July 2018 thleng zirtirna leh a taka tihchhinnate an neihpui dawn a,workshop a tel tur hian mi 49 an inziak lut a ni.