Kumin kum tawp lama inthlanna neih tur inpuahchahna kalzelah vawiin chawhnu khan Electoral Roll thar ber inthlanna atana rin tur chu DC Conference Hall, Champhaiah District Election Officer Dr.Naveen Aggarwal chuan a tlangzarh a. Party aiawh tinte hnenah Final Electoral Roll  copy khat theuh a Bu leh CD-in a hlan nghal a ni.

Dr. Naveen Aggarwal chuan India ram mipui rorelna innghahna leh hlawhtlinna laimu chu thianghlim leh felfai taka inthlanna kan kalpui thin vang hi a ni, a ti a. Khawvel ram thenkhatah inthlanna a felfai leh dik tawk loh laia India rama dik taka kalpui thin a ni chu Election Commission of India duh dan a nih thu a sawi a. Tumah vote nei thei chinte hmaih an nih lohna tur leh paih ngaite paiha siam that anih theih nan Electoral Roll chu siam thar zel thin a ni, a ti bawk.

Pu Lalremruata  Kullai, Election Officer, Champhai chuan Electoral Roll thar ber chungchang report pein kumin January Ni 15, 2018 khan Summary Revision, 2018 tihchhuah a lo nih tawh thu a sawi a. A hun taka Final Electoral Roll tihchhuah ani thei chu lawmawm a tih thu sawiin Election kaihnawih thila Party aiawh leh Media lamte tawiawm thinnaah lawm thu a sawi a ni.

General Elector Final Roll-in a tarlan danin Champhai District-a Assembly Constituency 5-ah  Vote nei Mipa 41,979 leh Hmeichhia 42,920 awmin a vaiin vote nei thei mi 84,899 an awm mek a, Mipa voter aiin Hmeichhe voter 941 in an tam zawk a, draft Roll aia voter punna hi 499 a ni. District chhungah  Polling Station 137 awmin, Polling Station 1 ah voter 620 zel awm ang a ni a. MLA Constituency zingah 23-Champhai North-ah voter 18,520 awmin a tam ber a, 25-E. Tuipui-ah voter 14,956 awmin vote nei awm tlemna ber a ni.

Polling Station malah chuan 22/3- Khawzawl-I, 22-Tuichang Assembly Constituency- ah voter 1170 awmin a tam bera, 21/24- Taitawkawn, 21- Lengteng Assembly Constituency-ah voter 54 awmin a tlem ber a ni. Sipai tang lai Service voter 613, mipa 611 leh  hmeichhia 2 an awm bawk a ni.

Election Commission of India in a ruahman angin 2^nd Special Summary Revision  neih zawh tak atanga dilna hrang hrang te chu chin fel anih hnuah Final Roll hi tlangzarh a ni a. A hranpaa Electoral Roll tihchhuah duh tan Soft Copy copy khat Rs 100/- leh Hard Copy phek 1 Rs 5/- zelin Election Office-ah a lei theih a ni.